Best Shayari on Life

ek misra.a hai zindagī merī

aap chāheñ to sher ho jaa.e

ek misra hai zindagi meri

aap chahen to sher ho jae

ham ne kitne dhoke meñ sab jīvan kī barbādī kī

gaal pe ik til dekh ke un ke saare jism se shādī kī

hum ne kitne dhoke mein sab jiwan ki barbaadi ki

gal pe ek til dekh ke un ke sare jism se shadi ki

sāvan ek mahīne 'qaisar' aañsū jīvan bhar

in āñkhoñ ke aage bādal be-auqāt lage

sawan ek mahine 'qaisar' aansu jiwan bhar

in aankhon ke aage baadal be-auqat lage

maanā jīvan meñ aurat ik baar mohabbat kartī hai

lekin mujh ko ye to batā de kyā tū aurat zaat nahīñ

mana jiwan mein aurat ek bar mohabbat karti hai

lekin mujh ko ye to bata de kya tu aurat zat nahin

jīvan kā sañgīt achānak antim sur ko chhū letā hai

hañstā hī rahtā hai phir bhī mere andar marne vaalā

jiwan ka sangit achanak antim sur ko chhu leta hai

hansta hi rahta hai phir bhi mere andar marne wala

aisā ho zindagī meñ koī ḳhvāb hī na ho

añdhiyārī raat meñ koī mahtāb hī na ho

aisa ho zindagi mein koi KHwab hi na ho

andhiyari raat mein koi mahtab hi na ho

ham ne saarā jīvan bāñTī pyaar kī daulat logoñ meñ

ham hī saarā jīvan tarse pyaar kī paa.ī paa.ī ko

hum ne sara jiwan banTi pyar ki daulat logon mein

hum hi sara jiwan tarse pyar ki pai pai ko

ġham kī band muTThī meñ ret sā mirā jīvan

jab zarā kasī muTThī zindagī bikhartī hai

gham ki band muTThi mein ret sa mera jiwan

jab zara kasi muTThi zindagi bikharti hai

'farīd' ik din sahāre zindagī ke TuuT jā.eñge

sabab ye hai ki ḳhud ko be-sahārā kar rahā huuñ maiñ

'farid' ek din sahaare zindagi ke TuT jaenge

sabab ye hai ki KHud ko be-sahaara kar raha hun main

sañgat diloñ kī jīvanoñ marnoñ kā irtibāt

phir Dar paḌā thā kyā tujhe gird-o-navāh kā

sangat dilon ki jiwanon marnon ka irtibaat

phir Dar paDa tha kya tujhe gird-o-nawah ka