Jashn-e-Rekhta 2024: Grand Mushaira

jab ġhazal 'mīr' kī paḌhtā hai paḌosī merā

ik namī sī mirī dīvār meñ aa jaatī hai

jab ghazal 'mir' ki paDhta hai paDosi mera

ek nami si meri diwar mein aa jati hai

yaad aatī hai achchhī sī koī baat sar-e-shām

phir sub.h talak sochte rahte haiñ vo kyā thī

yaad aati hai achchhi si koi baat sar-e-sham

phir subh talak sochte rahte hain wo kya thi

maiñ ne qubūl kar liyā chup chaap vo gulāb

jo shāḳh de rahī thī tirī or se mujhe

main ne qubul kar liya chup chap wo gulab

jo shaKH de rahi thi teri or se mujhe

safar ho shaah kā yā qāfila faqīroñ kā

shajar mizāj samajhte haiñ rāhgīroñ kā

safar ho shah ka ya qafila faqiron ka

shajar mizaj samajhte hain rahgiron ka

koī aise vaqt meñ ham se bichhḌā hai

shaam Dhale jab panchhī ghar lauT aate haiñ

koi aise waqt mein hum se bichhDa hai

sham Dhale jab panchhi ghar lauT aate hain

hādse raah ke zevar haiñ musāfir ke liye

ek Thokar jo lagī hai to irāda na badal

hadse rah ke zewar hain musafir ke liye

ek Thokar jo lagi hai to irada na badal

dekhtā huuñ tū nahīñ rahm ke qābil koī

sochtā huuñ to hazāroñ pe taras aatā hai

dekhta hun tu nahin rahm ke qabil koi

sochta hun to hazaron pe taras aata hai

ḳhud tiis kā hai aur dulhan saaTh baras kī

girtī huī dīvār ke saa.e meñ khaḌā hai

KHud tis ka hai aur dulhan saTh baras ki

girti hui diwar ke sae mein khaDa hai

nazākat hai bahut is meñ magar ye jāntā huuñ maiñ

mohabbat jis ko ho jaatī hai urdu siikh jaatā hai

nazakat hai bahut is mein magar ye jaanta hun main

mohabbat jis ko ho jati hai urdu sikh jata hai

'mīr' jī ishq maanā ki ne.amat nahīñ par maiñ is ko balā bhī nahīñ māntā

māntā huuñ ḳhudā-e-suḳhan bhī tumheñ aur hukm-e-ḳhudā bhī nahīñ māntā

'mir' ji ishq mana ki neamat nahin par main is ko bala bhi nahin manta

manta hun KHuda-e-suKHan bhi tumhein aur hukm-e-KHuda bhi nahin manta

dil bhī lahūluhān hai āñkheñ bhī haiñ udaas

shāyad anā ne shah-rag-e-jazbāt kaaT dī

dil bhi lahuluhan hai aankhen bhi hain udas

shayad ana ne shah-rag-e-jazbaat kaT di

sūraj lahūluhān samundar meñ gir paḌā

din kā ġhurūr TuuT gayā shaam ho ga.ī

suraj lahuluhan samundar mein gir paDa

din ka ghurur TuT gaya sham ho gai

dange meñ to halāk hue be-shumār log

kal kis tarah chhapegī ḳhabar dekhnā ye hai

dange mein to halak hue be-shumar log

kal kis tarah chhapegi KHabar dekhna ye hai

ye āñkheñ ye 'āriz ye lab aur gesū

inhīñ ke sabab ham Thikāne lage haiñ

ye aankhen ye 'ariz ye lab aur gesu

inhin ke sabab hum Thikane lage hain

chhin ga.ī kursī to leader par uThā liiñ kursiyāñ

jin pe takiya thā vahī patte havā dene lage

chhin gai kursi to leader par uTha lin kursiyan

jin pe takiya tha wahi patte hawa dene lage

gardish-e-vaqt ye kis moḌ pe laa.ī mujh ko

apnī har saañs bhī lagtī hai parā.ī mujh ko

gardish-e-waqt ye kis moD pe lai mujh ko

apni har sans bhi lagti hai parai mujh ko

vahshat aur sūnā-pan apnī zāt-e-tanhā.ī

aaj mai-kade ko bhī ḳhāna-e-ḳhudā paayā

wahshat aur suna-pan apni zat-e-tanhai

aaj mai-kade ko bhi KHana-e-KHuda paya

vo laḌkiyāñ ki jo lagtī thiiñ saada tahrīreñ

paḌhī ga.iiñ to anokhī paheliyāñ niklīñ

wo laDkiyan ki jo lagti thin sada tahriren

paDhi gain to anokhi paheliyan niklin

hoñToñ pe khil rahe haiñ sadāqat ke chand phuul

neze pe kab buland ho sar dekhnā ye hai

honTon pe khil rahe hain sadaqat ke chand phul

neze pe kab buland ho sar dekhna ye hai

umr guzrī ik nigāh-e-lutf kī ummīd meñ

ham ko apne hausloñ kī ye adā achchhī lagī

umr guzri ek nigah-e-lutf ki ummid mein

hum ko apne hauslon ki ye ada achchhi lagi