Saawan Shayari

bārish sharāb-e-arsh hai ye soch kar 'adam'

bārish ke sab hurūf ko ulTā ke pī gayā

barish sharab-e-arsh hai ye soch kar 'adam'

barish ke sab huruf ko ulTa ke pi gaya

maiñ chup karātā huuñ har shab umaDtī bārish ko

magar ye roz ga.ī baat chheḌ detī hai

main chup karaata hun har shab umaDti barish ko

magar ye roz gai baat chheD deti hai

yaad aa.ī vo pahlī bārish

jab tujhe ek nazar dekhā thā

yaad aai wo pahli barish

jab tujhe ek nazar dekha tha

barsāt kā bādal to dīvāna hai kyā jaane

kis raah se bachnā hai kis chhat ko bhigonā hai

barsat ka baadal to diwana hai kya jaane

kis rah se bachna hai kis chhat ko bhigona hai

ham se pūchho mizāj bārish kā

ham jo kachche makān vaale haiñ

hum se puchho mizaj barish ka

hum jo kachche makan wale hain

baras rahī thī bārish bāhar

aur vo bhiig rahā thā mujh meñ

baras rahi thi barish bahar

aur wo bhig raha tha mujh mein

vo tire nasīb kī bārisheñ kisī aur chhat pe baras ga.iiñ

dil-e-be-ḳhabar mirī baat sun use bhuul jā use bhuul jā

wo tere nasib ki barishen kisi aur chhat pe baras gain

dil-e-be-KHabar meri baat sun use bhul ja use bhul ja

ab ke sāvan meñ sharārat ye mire saath huī

merā ghar chhoḌ ke kul shahr meñ barsāt huī

ab ke sawan mein shararat ye mere sath hui

mera ghar chhoD ke kul shahr mein barsat hui

sāvan ek mahīne 'qaisar' aañsū jīvan bhar

in āñkhoñ ke aage bādal be-auqāt lage

sawan ek mahine 'qaisar' aansu jiwan bhar

in aankhon ke aage baadal be-auqat lage

nafas nafas pe yahāñ rahmatoñ kī bārish hai

hai bad-nasīb jise zindagī na raas aa.ī

nafas nafas pe yahan rahmaton ki barish hai

hai bad-nasib jise zindagi na ras aai

ho lene do bārish ham bhī ro leñge

dil meñ haiñ kuchh zaḳhm purāne dho leñge

ho lene do barish hum bhi ro lenge

dil mein hain kuchh zaKHm purane dho lenge

ye bārish kab rukegī kaun jaane

kahīñ maiñ mar na jā.ūñ tishnagī se

ye barish kab rukegi kaun jaane

kahin main mar na jaun tishnagi se

kal tire ehsās kī bārish tale

merā sūnā-pan nahāyā der tak

kal tere ehsas ki barish tale

mera suna-pan nahaya der tak

bārish kī bahut tez havā meñ kahīñ mujh ko

darpesh thā ik marhala jalne kī tarah kā

barish ki bahut tez hawa mein kahin mujh ko

darpesh tha ek marhala jalne ki tarah ka

sāvan kī is rim-jhim meñ

bhiig rahā hai tanhā chāñd

sawan ki is rim-jhim mein

bhig raha hai tanha chand

shoḳhiyāñ ma.asūmiyat schōl jhūlā bārisheñ

kitnī yādeñ saath laayā jab koī bachhḌā milā

shoKHiyan masumiyat school jhula barishen

kitni yaaden sath laya jab koi bachhDa mila

rahtī hai shab-o-roz meñ bārish sī tirī yaad

ḳhvāboñ meñ utar jaatī haiñ ghanghor sī āñkheñ

rahti hai shab-o-roz mein barish si teri yaad

KHwabon mein utar jati hain ghanghor si aankhen

ye husn-e-nau-bahār ye sāvan kī badliyāñ

piinā hai farz aur na piinā harām aaj

ye husn-e-nau-bahaar ye sawan ki badliyan

pina hai farz aur na pina haram aaj

paḌe haiñ nafrat ke biich dil meñ baras rahā hai lahū kā sāvan

harī-bharī haiñ saroñ kī fasleñ badan pe zaḳhmoñ ke gul khile haiñ

paDe hain nafrat ke bich dil mein baras raha hai lahu ka sawan

hari-bhari hain saron ki faslen badan pe zaKHmon ke gul khile hain

rukī rukī sī hai barsāt ḳhushk hai sāvan

ye aur baat ki mausam yahī numū kā hai

ruki ruki si hai barsat KHushk hai sawan

ye aur baat ki mausam yahi numu ka hai