ساون شاعری

وہ ترے نصیب کی بارشیں کسی اور چھت پہ برس گئیں

دل بے خبر مری بات سن اسے بھول جا اسے بھول جا

بارش شراب عرش ہے یہ سوچ کر عدمؔ

بارش کے سب حروف کو الٹا کے پی گیا

میں چپ کراتا ہوں ہر شب امڈتی بارش کو

مگر یہ روز گئی بات چھیڑ دیتی ہے

یاد آئی وہ پہلی بارش

جب تجھے ایک نظر دیکھا تھا

برسات کا بادل تو دیوانہ ہے کیا جانے

کس راہ سے بچنا ہے کس چھت کو بھگونا ہے

ہم سے پوچھو مزاج بارش کا

ہم جو کچے مکان والے ہیں

برس رہی تھی بارش باہر

اور وہ بھیگ رہا تھا مجھ میں

اب کے ساون میں شرارت یہ مرے ساتھ ہوئی

میرا گھر چھوڑ کے کل شہر میں برسات ہوئی

نفس نفس پہ یہاں رحمتوں کی بارش ہے

ہے بد نصیب جسے زندگی نہ راس آئی

ساون ایک مہینے قیصرؔ آنسو جیون بھر

ان آنکھوں کے آگے بادل بے اوقات لگے

ہو لینے دو بارش ہم بھی رو لیں گے

دل میں ہیں کچھ زخم پرانے دھو لیں گے

یہ بارش کب رکے گی کون جانے

کہیں میں مر نہ جاؤں تشنگی سے

کل ترے احساس کی بارش تلے

میرا سونا پن نہایا دیر تک

رہتی ہے شب و روز میں بارش سی تری یاد

خوابوں میں اتر جاتی ہیں گھنگھور سی آنکھیں

شوخیاں معصومیت اسکول جھولا بارشیں

کتنی یادیں ساتھ لایا جب کوئی بچھڑا ملا

ساون کی اس رم جھم میں

بھیگ رہا ہے تنہا چاند

بارش کی بہت تیز ہوا میں کہیں مجھ کو

درپیش تھا اک مرحلہ جلنے کی طرح کا

یہ حسن نو بہار یہ ساون کی بدلیاں

پینا ہے فرض اور نہ پینا حرام آج

رکی رکی سی ہے برسات خشک ہے ساون

یہ اور بات کہ موسم یہی نمو کا ہے

پڑے ہیں نفرت کے بیچ دل میں برس رہا ہے لہو کا ساون

ہری بھری ہیں سروں کی فصلیں بدن پہ زخموں کے گل کھلے ہیں