Top 10 couplets of Abroo Shah Mubarak

ḳhudāvandā karam kar fazl kar ahvāl par mere

nazar kar aap par mat kar nazar afa.āl par mere

KHudawanda karam kar fazl kar ahwal par mere

nazar kar aap par mat kar nazar afaal par mere

tum nazar kyuuñ churā.e jaate ho

jab tumheñ ham salām karte haiñ

tum nazar kyun churae jate ho

jab tumhein hum salam karte hain

yaaro hamārā haal sajan siiñ bayāñ karo

aisī tarah karo ki use mehrbāñ karo

yaro hamara haal sajan sin bayan karo

aisi tarah karo ki use mehrban karo

bosāñ labāñ siiñ dene kahā kah ke phir gayā

pyāla bharā sharāb kā afsos gir gayā

bosan laban sin dene kaha kah ke phir gaya

pyala bhara sharab ka afsos gir gaya

yuuñ 'ābrū' banāve dil meñ hazār bāteñ

jab rū-ba-rū ho tere guftār bhuul jaave

yun 'abru' banawe dil mein hazar baaten

jab ru-ba-ru ho tere guftar bhul jawe

ishq kā tiir dil meñ laagā hai

dard jo hovtā thā bhāgā hai

ishq ka tir dil mein laga hai

dard jo howta tha bhaga hai

tirā har uzv pyāre ḳhush-numā hai uzv-e-dīgar siiñ

mizha siiñ ḳhūb-tar abrū o abrū siiñ bhalī añkhiyāñ

tera har uzw pyare KHush-numa hai uzw-e-digar sin

mizha sin KHub-tar abru o abru sin bhali ankhiyan

tumhārī dekh kar ye ḳhush-ḳhirāmī āb-raftārī

gayā hai bhuul hairat siiñ piyā paanī ke ta.iiñ bahnā

tumhaari dekh kar ye KHush-KHirami aab-raftari

gaya hai bhul hairat sin piya pani ke tain bahna

duur ḳhāmosh baiThā rahtā huuñ

is tarah haal dil kā kahtā huuñ

dur KHamosh baiTha rahta hun

is tarah haal dil ka kahta hun

tumhāre log kahte haiñ kamar hai

kahāñ hai kis tarah kī hai kidhar hai

tumhaare log kahte hain kamar hai

kahan hai kis tarah ki hai kidhar hai