آبرو شاہ مبارک کے 10 منتخب شعر

خداوندا کرم کر فضل کر احوال پر میرے

نظر کر آپ پر مت کر نظر افعال پر میرے

تم نظر کیوں چرائے جاتے ہو

جب تمہیں ہم سلام کرتے ہیں

یارو ہمارا حال سجن سیں بیاں کرو

ایسی طرح کرو کہ اسے مہرباں کرو

بوساں لباں سیں دینے کہا کہہ کے پھر گیا

پیالہ بھرا شراب کا افسوس گر گیا

یوں آبروؔ بناوے دل میں ہزار باتیں

جب رو بہ رو ہو تیرے گفتار بھول جاوے

عشق کا تیر دل میں لاگا ہے

درد جو ہووتا تھا بھاگا ہے

ترا ہر عضو پیارے خوش نما ہے عضو دیگر سیں

مژہ سیں خوب تر ابرو و ابرو سیں بھلی انکھیاں

تمہاری دیکھ کر یہ خوش خرامی آب رفتاری

گیا ہے بھول حیرت سیں پیا پانی کے تئیں بہنا

دور خاموش بیٹھا رہتا ہوں

اس طرح حال دل کا کہتا ہوں

تمہارے لوگ کہتے ہیں کمر ہے

کہاں ہے کس طرح کی ہے کدھر ہے