Top 10 couplets of Kaif Bhopali

daaġh duniyā ne diye zaḳhm zamāne se mile

ham ko tohfe ye tumheñ dost banāne se mile

dagh duniya ne diye zaKHm zamane se mile

hum ko tohfe ye tumhein dost banane se mile

zindagī shāyad isī kā naam hai

dūriyāñ majbūriyāñ tanhā.iyāñ

zindagi shayad isi ka nam hai

duriyan majburiyan tanhaiyan

aag kā kyā hai pal do pal meñ lagtī hai

bujhte bujhte ek zamānā lagtā hai

aag ka kya hai pal do pal mein lagti hai

bujhte bujhte ek zamana lagta hai

mai-kasho aage baḌho tishna-labo aage baḌho

apnā haq māñgā nahīñ jaatā hai chhīnā jaa.e hai

mai-kasho aage baDho tishna-labo aage baDho

apna haq manga nahin jata hai chhina jae hai

kaun aa.egā yahāñ koī na aayā hogā

merā darvāza havāoñ ne hilāyā hogā

kaun aaega yahan koi na aaya hoga

mera darwaza hawaon ne hilaya hoga

is gulistāñ kī yahī riit hai ai shāḳh-e-gul

tū ne jis phuul ko paalā vo parāyā hogā

is gulistan ki yahi rit hai ai shaKH-e-gul

tu ne jis phul ko pala wo paraya hoga

chalte haiñ bach ke shaiḳh o barhaman ke saa.e se

apnā yahī amal hai bure aadmī ke saath

chalte hain bach ke shaiKH o barhaman ke sae se

apna yahi amal hai bure aadmi ke sath

'kaif' paidā kar samundar kī tarah

vus.ateñ ḳhāmoshiyāñ gahrā.iyāñ

'kaif' paida kar samundar ki tarah

wusaten KHamoshiyan gahraiyan

gul se lipTī huī titlī ko girā kar dekho

āñdhiyo tum ne daraḳhtoñ ko girāyā hogā

gul se lipTi hui titli ko gira kar dekho

aandhiyo tum ne daraKHton ko giraya hoga

saaya hai kam khajūr ke ūñche daraḳht kā

ummīd bāñdhiye na baḌe aadmī ke saath

saya hai kam khajur ke unche daraKHt ka

ummid bandhiye na baDe aadmi ke sath