Top 10 couplets of Qayem Chandpuri

qismat to dekh TuuTī hai jā kar kahāñ kamand

kuchh duur apne haath se jab baam rah gayā

qismat to dekh TuTi hai ja kar kahan kamand

kuchh dur apne hath se jab baam rah gaya

ġhair se milnā tumhārā sun ke go ham chup rahe

par sunā hogā ki tum ko ik jahāñ ne kyā kahā

ghair se milna tumhaara sun ke go hum chup rahe

par suna hoga ki tum ko ek jahan ne kya kaha

zālim tū merī sāda-dilī par to rahm kar

rūThā thā tujh se aap hī aur aap man gayā

zalim tu meri sada-dili par to rahm kar

ruTha tha tujh se aap hi aur aap man gaya

kis baat par tirī maiñ karūñ e'tibār haa.e

iqrār yak taraf hai to inkār yak taraf

kis baat par teri main karun e'tibar hae

iqrar yak taraf hai to inkar yak taraf

chāheñ haiñ ye ham bhī ki rahe paak mohabbat

par jis meñ ye duurī ho vo kyā ḳhaak mohabbat

chahen hain ye hum bhi ki rahe pak mohabbat

par jis mein ye duri ho wo kya KHak mohabbat

TuuTā jo ka.aba kaun sī ye jā-e-ġham hai shaiḳh

kuchh qasr-e-dil nahīñ ki banāyā na jā.egā

TuTa jo kaba kaun si ye ja-e-gham hai shaiKH

kuchh qasr-e-dil nahin ki banaya na jaega

mai kī tauba ko to muddat huī 'qā.em' lekin

be-talab ab bhī jo mil jaa.e to inkār nahīñ

mai ki tauba ko to muddat hui 'qaem' lekin

be-talab ab bhi jo mil jae to inkar nahin

har dam aane se maiñ bhī huuñ nādim

kyā karūñ par rahā nahīñ jaatā

har dam aane se main bhi hun nadim

kya karun par raha nahin jata

na jaane kaun sī saa.at chaman se bichhḌe the

ki aañkh bhar ke na phir sū-e-gulsitāñ dekhā

na jaane kaun si saat chaman se bichhDe the

ki aankh bhar ke na phir su-e-gulsitan dekha

nazar meñ ka.aba kyā Thahre ki yaañ dair

rahā hai muddatoñ maskan hamārā

nazar mein kaba kya Thahre ki yan dair

raha hai muddaton maskan hamara