Top 10 couplets of Yagana Changezi

gunāh gin ke maiñ kyuuñ apne dil ko chhoTā karūñ

sunā hai tere karam kā koī hisāb nahīñ

gunah gin ke main kyun apne dil ko chhoTa karun

suna hai tere karam ka koi hisab nahin

dard ho to davā bhī mumkin hai

vahm kī kyā davā kare koī

dard ho to dawa bhi mumkin hai

wahm ki kya dawa kare koi

maut māñgī thī ḳhudā.ī to nahīñ māñgī thī

le duā kar chuke ab tark-e-duā karte haiñ

maut mangi thi KHudai to nahin mangi thi

le dua kar chuke ab tark-e-dua karte hain

sab tire sivā kāfir āḳhir is kā matlab kyā

sar phirā de insāñ kā aisā ḳhabt-e-maz.hab kyā

sab tere siwa kafir aaKHir is ka matlab kya

sar phira de insan ka aisa KHabt-e-mazhab kya

ḳhudī kā nashsha chaḌhā aap meñ rahā na gayā

ḳhudā bane the 'yagānā' magar banā na gayā

KHudi ka nashsha chaDha aap mein raha na gaya

KHuda bane the 'yagana' magar bana na gaya

pahāḌ kāTne vaale zamīñ se haar ga.e

isī zamīn meñ dariyā samā.e haiñ kyā kyā

pahaD kaTne wale zamin se haar gae

isi zamin mein dariya samae hain kya kya

na diin ke hue mohsin ham aur na duniyā ke

butoñ se ham na mile aur hameñ ḳhudā na milā

na din ke hue mohsin hum aur na duniya ke

buton se hum na mile aur hamein KHuda na mila

mujhe ai nāḳhudā āḳhir kisī ko muñh dikhānā hai

bahāna kar ke tanhā paar utar jaanā nahīñ aatā

mujhe ai naKHuda aaKHir kisi ko munh dikhana hai

bahana kar ke tanha par utar jaana nahin aata

duniyā se 'yās' jaane ko jī chāhtā nahīñ

allāh re husn gulshan-e-nā-pā.edār kā

duniya se 'yas' jaane ko ji chahta nahin

allah re husn gulshan-e-na-paedar ka

'yās' is charḳh-e-zamāna-sāz kā kyā e'tibār

mehrbāñ hai aaj kal nā-mehrbāñ ho jā.egā

'yas' is charKH-e-zamana-saz ka kya e'tibar

mehrban hai aaj kal na-mehrban ho jaega