aaKHirii mulaaqaat kaa giit

merā siina sard aur be-jān hotā gayā

magar mere qadam subuk rahe

maiñ ne apne baa.eñ haath kā dastāna

ġhalatī se daa.eñ haath par chaḌhā liyā

aisā lag rahā thā vahāñ bahut saarī sīḌhiyāñ thiiñ

maiñ jāntī thī vo sirf tiin thiiñ

maple ke daraḳhtoñ ke darmiyān

ḳhizāñ kī sargoshī isrār kartī rahī mere saath mar jaao

taġhayyur ne mujhe thakā Daalā hai

taqdīr ne dhoke se merā sab kuchh hathiyā liyā hai

maiñ ne javāb diyā merī pyārī merī pyārī

maiñ bhī tumhāre saath marūñgī

maiñ bhī aziyyat meñ huuñ

ye āḳhirī mulāqāt kā giit thā

maiñ ne makān ke tārīk dar-o-dīvār par nazar Daalī

sirf ḳhvāb-gāh kī mom-battiyāñ jal rahī thiiñ

jin ke sho'le zard aur be-niyāz the

mera sina sard aur be-jaan hota gaya

magar mere qadam subuk rahe

main ne apne baen hath ka dastana

ghalati se daen hath par chaDha liya

aisa lag raha tha wahan bahut sari siDhiyan thin

main jaanti thi wo sirf tin thin

maple ke daraKHton ke darmiyan

KHizan ki sargoshi israr karti rahi mere sath mar jao

taghayyur ne mujhe thaka Dala hai

taqdir ne dhoke se mera sab kuchh hathiya liya hai

main ne jawab diya meri pyari meri pyari

main bhi tumhaare sath marungi

main bhi aziyyat mein hun

ye aaKHiri mulaqat ka git tha

main ne makan ke tarik dar-o-diwar par nazar Dali

sirf KHwab-gah ki mom-battiyan jal rahi thin

jin ke sho'le zard aur be-niyaz the