aaraam-talab

(1)

duniyaa kii har ik chiiz ko mil jaataa hai aaraam

insaan kii qismat me.n hai din raat magar kaam

har chiiz ko jab hotaa hai aaraam mayassar

insaan pareshaan hii kyo.n rahtaa hai aksar

ham ashraf-e-maKHluuq hai.n mumtaaz hai.n sab se

khaate hai.n magar roz havaadis ke thape.De

har roz na.e ranj hai.n armaan na.e hai.n

insaan kii taKHriib ke saamaan na.e hai.n

dam bhar ke liye gardish-e-ayyaam Thahar jaa.e

har sub.h Thahar jaa.e har ik shaam Thahar jaa.e

ham nii.nd kii aaGosh me.n dam le nahii.n sakte

aaraam kaa ik saa.ns bhii ham le nahii.n sakte

aaraam bhii insaan ko laazim hai kabhii to

ham ashraf-e-maKHluuq hai.n ye baat na bhuulo

(2)

dekho to zaraa sehn-e-gulistaa.n kaa tamaashaa

ko.npal me.n bhii hotaa hai asar baad-e-sabaa kaa

patte se bhii kartii hai vahii baad-e-sabaa pyaar

patte ke muqaddar me.n na aalaam na afkaar

din ko to vo suuraj kii shu'aa'o.n me.n nahaa.e

phir chaa.ndnii shabnam kaa use duudh pilaa.e

gir jaa.egaa jab shaaKH se murjhaa ke zamii.n par

le jaa.egii phir baad-e-sabaa saath u.Daa kar

har seb me.n ham ko nazar aatii hai yahii baat

pak jaane pe gir jaa.egaa chupke se kisii raat

dekhe ko.ii har phuul kii hastii kaa tamaashaa

khil jaataa hai murjhaataa hai kuchh fikr na parvaa

kuchh kaam mashaqqat se na aaraam se kuchh kaam

baKHshaa hai mashiyyat ne har ik chiiz ko aaraam

(3)

is gumbad-e-aflaak ke chakkar me.n na aa.o

is qulzum-e-zaKHKHaar me.n Dubkii na lagaa.o

insaan kii hastii kaa hai jab maut hii anjaam

phir kis liye ye kaavishe.n kis kaam kaa phir kaam

ham vaqt kii raftaar ko Theraa nahii.n sakte

guzre hu.e lamhaat ko phir laa nahii.n sakte

kyaa jaane ki aa jaa.egaa kab maut kaa paiGaam

behtar hai ki aaraam kare.n chho.D ke sab kaam

vo kaun sii shai hai jise duniyaa me.n baqaa hai

phir jehd-e-musalsal kaa yahaa.n KHaak mazaa hai

is jehd-e-musalsal me.n sukuu.n mil nahii.n saktaa

duniyaa me.n hai.n sab 'aib to ham is me.n kare.n kyaa

aalaam kii yalGaar se dil Tuut gayaa hai

kuchh lutf hai jiine me.n na marne me.n mazaa hai

us vaadii-e-pur-kaif me.n aaraam se so jaa.e.n

ham chho.D ke ghar-baar usii des ke ho jaa.e.n

(4)

KHush-rang ka.nval dekhiye har samt khilaa hai

is vaadii-e-ra.ngii.n kii fazaa hosh-rubaa hai

har vaqt yahaa.n chaltii hai.n jaa.n-baKHsh havaa.e.n

is vaadii-e-shaadaab ko kyo.n chho.D ke jaa.e.n

ham gardish-e-paiham kaa mazaa dekh chuke hai.n

ham pesh-e-nazar apnii qazaa dekh chuke hai.n

ham bahr ke girdaab-e-balaa dekh chuke hai.n

ham hashr ke tuufaan bapaa dekh chuke hai.n

ai saathiyo ham aaj qasam khaa ke kahe.nge

taa-hashr isii vaadii-e-dilkash me.n rahe.nge

aaraam kare.nge isii sarsabz zamii.n par

bal aa.e hii kyo.n shor-e-havaadis se jabii.n par

rahte hai.n malaa.ik bhii yuu.nhii 'arsh-e-barii.n par

aur bijliyaa.n barsaate hai.n rif'at se zamii.n par

aivaan me.n leTe hu.e piite hai.n vo din raat

ha.ns dete hai.n jab dekhte hai.n dahr ke aafaat

duniyaa me.n kahii.n jang kahii.n qaht kahii.n aag

insaan ko amraaz ke Daste hai.n kahii.n naag

ma.njdhaar me.n insaan kahii.n Duub rahaa hai

imdaad-talab suu-e-falak dast-e-du'aa hai

ha.nste hai.n malaa.ik to hame.n dekh ke naashaad

aflaak-nashiino.n ke liye giit hai fariyaad

taqdiir ke rau.nde hu.e logo.n kii shikaayat

hai ‘arsh-nashiino.n ke liye laGv hikaayat

ye qahr-zada log jo fariyaad-kunaa.n hai.n

mazluum hai.n paamaal-e-sitam-haa-e-zamaa.n hai.n

ye ahl-e-zamii.n karte hai.n din raat mashaqqat

hisse me.n magar in ke na daulat hai na raahat

ho jaa.egaa jab KHatm ye hastii kaa fasaana

mil jaa.egaa bechaaro.n ko dozaKH me.n Thikaana

ye aatish-e-dozaKH kii bhii dekhe.nge aziyyat

baaqii hai abhii in ke liye ye bhii musiibat

sunte hai.n ki jannat me.n bhii kuchh log rahe.nge

jo raahat-o-aaraam ko labbaik kahe.nge

aaraam me.n hastii kaa ba.Daa raaz nihaa.n hai

jo baat hai saahil pe vo maujo.n me.n kahaa.n hai

is vaadii-e-ra.ngii.n me.n bhii jannat kaa mazaa hai

phuulo.n kaa bichhaunaa hai dil-aavez fazaa hai

behtar hai mashaqqat se to har haal me.n aaraam

ai saathiyo bhuule se bhii jaane kaa na lo naam

(1)

duniyaa kii har ik chiiz ko mil jaataa hai aaraam

insaan kii qismat me.n hai din raat magar kaam

har chiiz ko jab hotaa hai aaraam mayassar

insaan pareshaan hii kyo.n rahtaa hai aksar

ham ashraf-e-maKHluuq hai.n mumtaaz hai.n sab se

khaate hai.n magar roz havaadis ke thape.De

har roz na.e ranj hai.n armaan na.e hai.n

insaan kii taKHriib ke saamaan na.e hai.n

dam bhar ke liye gardish-e-ayyaam Thahar jaa.e

har sub.h Thahar jaa.e har ik shaam Thahar jaa.e

ham nii.nd kii aaGosh me.n dam le nahii.n sakte

aaraam kaa ik saa.ns bhii ham le nahii.n sakte

aaraam bhii insaan ko laazim hai kabhii to

ham ashraf-e-maKHluuq hai.n ye baat na bhuulo

(2)

dekho to zaraa sehn-e-gulistaa.n kaa tamaashaa

ko.npal me.n bhii hotaa hai asar baad-e-sabaa kaa

patte se bhii kartii hai vahii baad-e-sabaa pyaar

patte ke muqaddar me.n na aalaam na afkaar

din ko to vo suuraj kii shu'aa'o.n me.n nahaa.e

phir chaa.ndnii shabnam kaa use duudh pilaa.e

gir jaa.egaa jab shaaKH se murjhaa ke zamii.n par

le jaa.egii phir baad-e-sabaa saath u.Daa kar

har seb me.n ham ko nazar aatii hai yahii baat

pak jaane pe gir jaa.egaa chupke se kisii raat

dekhe ko.ii har phuul kii hastii kaa tamaashaa

khil jaataa hai murjhaataa hai kuchh fikr na parvaa

kuchh kaam mashaqqat se na aaraam se kuchh kaam

baKHshaa hai mashiyyat ne har ik chiiz ko aaraam

(3)

is gumbad-e-aflaak ke chakkar me.n na aa.o

is qulzum-e-zaKHKHaar me.n Dubkii na lagaa.o

insaan kii hastii kaa hai jab maut hii anjaam

phir kis liye ye kaavishe.n kis kaam kaa phir kaam

ham vaqt kii raftaar ko Theraa nahii.n sakte

guzre hu.e lamhaat ko phir laa nahii.n sakte

kyaa jaane ki aa jaa.egaa kab maut kaa paiGaam

behtar hai ki aaraam kare.n chho.D ke sab kaam

vo kaun sii shai hai jise duniyaa me.n baqaa hai

phir jehd-e-musalsal kaa yahaa.n KHaak mazaa hai

is jehd-e-musalsal me.n sukuu.n mil nahii.n saktaa

duniyaa me.n hai.n sab 'aib to ham is me.n kare.n kyaa

aalaam kii yalGaar se dil Tuut gayaa hai

kuchh lutf hai jiine me.n na marne me.n mazaa hai

us vaadii-e-pur-kaif me.n aaraam se so jaa.e.n

ham chho.D ke ghar-baar usii des ke ho jaa.e.n

(4)

KHush-rang ka.nval dekhiye har samt khilaa hai

is vaadii-e-ra.ngii.n kii fazaa hosh-rubaa hai

har vaqt yahaa.n chaltii hai.n jaa.n-baKHsh havaa.e.n

is vaadii-e-shaadaab ko kyo.n chho.D ke jaa.e.n

ham gardish-e-paiham kaa mazaa dekh chuke hai.n

ham pesh-e-nazar apnii qazaa dekh chuke hai.n

ham bahr ke girdaab-e-balaa dekh chuke hai.n

ham hashr ke tuufaan bapaa dekh chuke hai.n

ai saathiyo ham aaj qasam khaa ke kahe.nge

taa-hashr isii vaadii-e-dilkash me.n rahe.nge

aaraam kare.nge isii sarsabz zamii.n par

bal aa.e hii kyo.n shor-e-havaadis se jabii.n par

rahte hai.n malaa.ik bhii yuu.nhii 'arsh-e-barii.n par

aur bijliyaa.n barsaate hai.n rif'at se zamii.n par

aivaan me.n leTe hu.e piite hai.n vo din raat

ha.ns dete hai.n jab dekhte hai.n dahr ke aafaat

duniyaa me.n kahii.n jang kahii.n qaht kahii.n aag

insaan ko amraaz ke Daste hai.n kahii.n naag

ma.njdhaar me.n insaan kahii.n Duub rahaa hai

imdaad-talab suu-e-falak dast-e-du'aa hai

ha.nste hai.n malaa.ik to hame.n dekh ke naashaad

aflaak-nashiino.n ke liye giit hai fariyaad

taqdiir ke rau.nde hu.e logo.n kii shikaayat

hai ‘arsh-nashiino.n ke liye laGv hikaayat

ye qahr-zada log jo fariyaad-kunaa.n hai.n

mazluum hai.n paamaal-e-sitam-haa-e-zamaa.n hai.n

ye ahl-e-zamii.n karte hai.n din raat mashaqqat

hisse me.n magar in ke na daulat hai na raahat

ho jaa.egaa jab KHatm ye hastii kaa fasaana

mil jaa.egaa bechaaro.n ko dozaKH me.n Thikaana

ye aatish-e-dozaKH kii bhii dekhe.nge aziyyat

baaqii hai abhii in ke liye ye bhii musiibat

sunte hai.n ki jannat me.n bhii kuchh log rahe.nge

jo raahat-o-aaraam ko labbaik kahe.nge

aaraam me.n hastii kaa ba.Daa raaz nihaa.n hai

jo baat hai saahil pe vo maujo.n me.n kahaa.n hai

is vaadii-e-ra.ngii.n me.n bhii jannat kaa mazaa hai

phuulo.n kaa bichhaunaa hai dil-aavez fazaa hai

behtar hai mashaqqat se to har haal me.n aaraam

ai saathiyo bhuule se bhii jaane kaa na lo naam