chhuuTaa hu.aa ghar

jāntī huuñ ki duur ek ghar se

zindagī kī ḳhushī jā chukī hai

ro rahā hai vahāñ koī bachcha

jis kī maañ chhoḌ kar jā chukī hai

har ghaḌī zehn meñ dauḌtā hai

naqsh-e-bistar ki hai ḳhālī-o-sard

naqsh us haath kā jis ne Dhālā

ek paikar vahāñ bā-ġham-o-dard

dekhtī huuñ kanār-e-buḳhārī

saaya us kā hai kamzōr-o-larzāñ

saaya un bāzuoñ kā ki jin ko

zindagī chhoḌ denā thā āsāñ

duur sotā hai ġhamgīn bachcha

ḳhasta-o-pīr daaya ke bar meñ

duudh qālīñ ke phūloñ meñ hai jazb

sar-nigūñ ek pyālī paḌī hai

rah ga.ī hai khulī ek khiḌkī

rang phūloñ kā uḌne lagā hai

parda uftāda shāne pe dar ke

āb-e-guldān sūkhā paḌā hai

āñkheñ billī kī haiñ sard-o-be-nūr

narm bojhal qadam rakh rahī hai

sham' kā sho'la-e-āḳhirīñ hai

goyā ab hichkiyāñ le rahī hai

jāntī huuñ ki duur ek ghar se

zindagī kī ḳhushī jā chukī hai

ro rahā hai vahāñ koī bachcha

jis kī maañ chhoḌ kar jā chukī hai

aah maiñ ḳhasta-jān-o-pareshāñ

apnī dhun meñ chalī jā rahī huuñ

yār-e-man she'r o dil-dār-e-man she'r

jā rahī huuñ ki bas us ko pā luuñ

jaanti hun ki dur ek ghar se

zindagi ki KHushi ja chuki hai

ro raha hai wahan koi bachcha

jis ki man chhoD kar ja chuki hai

har ghaDi zehn mein dauDta hai

naqsh-e-bistar ki hai KHali-o-sard

naqsh us hath ka jis ne Dhaala

ek paikar wahan ba-gham-o-dard

dekhti hun kanar-e-buKHari

saya us ka hai kamzoor-o-larzan

saya un bazuon ka ki jin ko

zindagi chhoD dena tha aasan

dur sota hai ghamgin bachcha

KHasta-o-pir daya ke bar mein

dudh qalin ke phulon mein hai jazb

sar-nigun ek pyali paDi hai

rah gai hai khuli ek khiDki

rang phulon ka uDne laga hai

parda uftada shane pe dar ke

aab-e-guldan sukha paDa hai

aankhen billi ki hain sard-o-be-nur

narm bojhal qadam rakh rahi hai

sham' ka sho'la-e-aKHirin hai

goya ab hichkiyan le rahi hai

jaanti hun ki dur ek ghar se

zindagi ki KHushi ja chuki hai

ro raha hai wahan koi bachcha

jis ki man chhoD kar ja chuki hai

aah main KHasta-jaan-o-pareshan

apni dhun mein chali ja rahi hun

yar-e-man she'r o dil-dar-e-man she'r

ja rahi hun ki bas us ko pa lun