du'aa

har samt muhīb tīrgī hai

yā-rab mirī jaan par banī hai

terā hai faqat mujhe sahārā

manzil se abhī huuñ maiñ bahut duur

thoḌā sā bhī raah meñ nahīñ nuur

chalne kā nahīñ mujh meñ yaarā

ab paañv bhī Dagmagā rahe haiñ

yā-rab hai tirā hī ik sahārā

bas gām-do-gām rahbarī kar

rahmat kā zarā sā ho ishārā

(2)

hai qābil-e-rahm ḳhasta-hālī

kab tak ye rahegī pā.imālī

ab tak na kabhī huā savālī

ḳhud apnī maiñ raah DhūñDhtā thā

DhūñDā na kabhī tirā sahārā

tang aa ke hī ab tujhe pukārā

dil meñ thī agarche ik ḳhalish sī

maiñ nām-o-numūd par fidā thā

sar meñ thā bharā huā takabbur

ab merī ḳhatā ko bhuul hī jā

(3)

ab tak rahā sar pe haath terā

chhoḌā nahīñ tū ne saath merā

lekin abhī duur hai saverā

baaqī hai abhī to zulmat-e-shab

kyā jaane tulū'-e-sub.h ho kab

bas ek nigāh mujh pe yā-rab

ho jā.egī jab sahar huvaidā

aa jā.egī sāmne tajallī

jo aañkh se ho ga.ī hai ojhal

har dam hai mujhe talāsh jis kī

har samt muhib tirgi hai

ya-rab meri jaan par bani hai

tera hai faqat mujhe sahaara

manzil se abhi hun main bahut dur

thoDa sa bhi rah mein nahin nur

chalne ka nahin mujh mein yara

ab panw bhi Dagmaga rahe hain

ya-rab hai tera hi ek sahaara

bas gam-do-gam rahbari kar

rahmat ka zara sa ho ishaara

(2)

hai qabil-e-rahm KHasta-haali

kab tak ye rahegi paimali

ab tak na kabhi hua sawali

KHud apni main rah DhunDhta tha

DhunDa na kabhi tera sahaara

tang aa ke hi ab tujhe pukara

dil mein thi agarche ek KHalish si

main nam-o-numud par fida tha

sar mein tha bhara hua takabbur

ab meri KHata ko bhul hi ja

(3)

ab tak raha sar pe hath tera

chhoDa nahin tu ne sath mera

lekin abhi dur hai sawera

baqi hai abhi to zulmat-e-shab

kya jaane tulu'-e-subh ho kab

bas ek nigah mujh pe ya-rab

ho jaegi jab sahar huwaida

aa jaegi samne tajalli

jo aankh se ho gai hai ojhal

har dam hai mujhe talash jis ki