دعا

ہر سمت مہیب تیرگی ہے

یارب مری جان پر بنی ہے

تیرا ہے فقط مجھے سہارا

منزل سے ابھی ہوں میں بہت دور

تھوڑا سا بھی راہ میں نہیں نور

چلنے کا نہیں مجھ میں یارا

اب پاؤں بھی ڈگمگا رہے ہیں

یارب ہے ترا ہی اک سہارا

بس گام دو گام رہبری کر

رحمت کا ذرا سا ہو اشارا

(۲)

ہے قابل رحم خستہ حالی

کب تک یہ رہے گی پائمالی

اب تک نہ کبھی ہوا سوالی

خود اپنی میں راہ ڈھونڈھتا تھا

ڈھونڈا نہ کبھی ترا سہارا

تنگ آ کے ہی اب تجھے پکارا

دل میں تھی اگرچہ اک خلش سی

میں نام و نمود پر فدا تھا

سر میں تھا بھرا ہوا تکبر

اب میری خطا کو بھول ہی جا

(۳)

اب تک رہا سر پہ ہاتھ تیرا

چھوڑا نہیں تو نے ساتھ میرا

لیکن ابھی دور ہے سویرا

باقی ہے ابھی تو ظلمت شب

کیا جانے طلوع صبح ہو کب

بس ایک نگاہ مجھ پہ یارب

ہو جائے گی جب سحر ہویدا

آ جائے گی سامنے تجلی

جو آنکھ سے ہو گئی ہے اوجھل

ہر دم ہے مجھے تلاش جس کی