ham-safar

(1)

manzūr yahī jab mujhe ai jān-e-jahāñ hai

jo merā muqaddar hai vo ab mujh pe 'ayāñ hai

nākām rahā aah mirā jazba-e-ulfat

hisse meñ mire aa.ī hai mahrūmī-o-hasrat

likkhā hai jo taqdīr meñ vo ho ke rahegā

ab tak hai magar dil meñ vahī terī mohabbat

rahtī hai mire sāmne har dam tirī sūrat

go vasl kī ummīd tujhe sauñp chukā huuñ

us par bhī tirī yaad kā pāband-e-vafā huuñ

kuchh aur bhī kahnā hai magar terī razā se

ghoḌe pe chaleñ sair kā kuchh lutf to aa.e

(2)

ye sun ke jabīñ jhuk ga.ī us shoḳh-adā kī

nazreñ bhī jhukīñ jin meñ ra'ūnat thī balā kī

dekhā jo zarā merī taraf aañkh uThā kar

kuchh aa hī gayā rahm mere hāl-e-zabūñ par

pūchho na kuchh us vaqt dil-e-zār kā 'ālam

itne meñ huī mujh pe 'ināyāt kī bārish

manzūr huī merī ye chhoTī sī guzārish

ab raḳhsh par ham baiTheñge vo hogī mire paas

qurbat se hameñ hogā mohabbat kā bhī ehsās

us sā'at-e-nādir ko maiñ samjhūñgā ġhanīmat

kyā jaane ki aa jaa.e usī roz qayāmat

(3)

phir baiTh ga.ī mere hī ghoḌe pe vo tannāz

par lag ga.e dil ko bhī huā mā.il-e-parvāz

phir mujh ko milī merī vo gum-gashta javānī

maazī thā mire vāste ab ek kahānī

jo biit chukā mere liye biit chukā thā

kyoñ sochtā yuuñ kartā to ho saktī thī ye baat

ab sūd-o-ziyāñ ke the kahāñ dil meñ ḳhayālāt

ye kahiye ki qismat ne diyā ab to mirā saath

jā saktī thī varna vo mirā chhoḌ ke bhī haath

kyā mujh pe guzarnī thī bigaḌ jaatā agar kaam

ab raḳhsh pe baiThī hai mire saath vo gulfām

(4)

maanā ki milā jo vo tamanna se hai kamtar

sab kuchh to nahīñ hotā kisī ko bhī mayassar

mahbūb ke pahlū meñ ye kyā kam thī savārī

us vaqt mirī ruuh pe thā kaif sā taarī

duniyā kī har ik chiiz thī raqsāñ mire aage

sochā ki kiyā karte haiñ sab log riyāzat

kitne haiñ magar jin ke qadam chuum le nusrat

takmīl kahāñ paate haiñ duniyā meñ sabhī kaam

āġhāz to āsān hai dushvār hai anjām

sochā thā hamesha vo mire paas rahegī

ab raḳhsh pe hai saath chalo ye bhī hai kaafī

(5)

hone ko to hote haiñ ka.ī dil meñ 'azā.im

har 'azm kī takmīl kahāñ hotī hai daa.im

ho laakh kisī kaam se insāñ ko lagāvaT

kis kaam meñ aatī nahīñ darpesh rukāvaT

sad-shukr ki jī bhar ke use dekh rahā huuñ

leader ko zarā dekhiye kyā miltā hai in'ām

mar jaane pe chhap jā.egā aḳhbār meñ bas naam

jāñbāz sipāhī ko ye hotā hai mayassar

khodegā pas-e-marg koī naam lahad par

leader kā hai ye haal sipāhī kā ye anjām

maiñ ḳhush huuñ ki donoñ se hai baḌh kar mirā in'ām

(6)

ai qulzum-e-afkār meñ Duube hue shā'ir

alfāz se tū she'r banāne meñ hai māhir

hai terā qalam husn-e-jahāñ-tāb kā maz.har

de saktā hai jazbāt ko alfāz kā paikar

bhar detā hai alfāz ke paikar meñ tarannum

maanā ki baḌī chiiz hai ye kaam hai mushkil

kyā ḳhud bhī magar tujh ko hai ne'mat koī hāsil

juz 'usrat-o-adbār tire paas hī kyā hai

kyā tishna-labī hī tirī kāvish kā sila hai

ye maan liyā zauq-e-suḳhan se huuñ maiñ 'aarī

lekin tirī qīmat meñ kahāñ aisī savārī

(7)

but-gar se kaho tū ne bhī kī fan kī 'ibādat

rakhtā hai fan-e-sang-tarāshī meñ mahārat

'venus' kā ye but jis ko samajhtā hai tū shahkār

rakhtā hai kashish is se to baḌh kar vo tarahdār

is par bhī hai tū shaad to kyoñ mujh ko ho afsos

ai māhir-e-mausīqī zarā tujh se karūñ baat

is fan kī 'ibādat meñ huī vaqf tirī zaat

afsos ki bas itnī hī miltī hai tujhe daad

kar saktā hai tū saaz kī jhankār se dil shaad

is par bhī ye mushkil ki badal jaate haiñ me'yār

hai 'ishq kā ye faiz ki ham-dosh hai dil-dār

(8)

kyā Thiik hai insāñ ke liye us ko ḳhabar kyā

manzūr agar kātib-e-taqdīr ko hotā

ho jaatī yahīñ vasl kī ne'mat bhī mayassar

lekin koī nā-'āqibat-andesh ho kyūñkar

insān ko andesha-e-'uqbā bhī hai lāzim

ho jaatā agar ziist meñ puurā mirā manshā

mil jaatī yahīñ mujh ko mirī jān-e-tamannā

'uqbā ke liye phir koī rahtā na sahārā

sad-shukr ki kashtī se rahā duur kinārā

ho lene do ab raḳhsh pe dam bhar mujhe mahzūz

mahbūb bhī mahfūz hai 'uqbā bhī hai mahfūz

(9)

ḳhāmosh thī vo rashk-e-qamar ġhairat-e-firdaus

māhaul thā mere liye ham-sūrat-e-firdaus

vo māh-laqā mujh se thī us vaqt baġhal-gīr

aisī hī huā kartī hai firdaus kī tasvīr

mumkin hai ki ban jaa.eñ ye lamhāt davāmī

baiThe hī raheñ raḳhsh pe tā-roz-e-qayāmat

har vaqt rahe sāmne vo chāñd sī sūrat

armāñ bhī nikalte raheñ hasrat bhī ho baaqī

ban jā.egā firdaus yahī 'ālam-e-ḳhākī

hogī na kabhī ḳhatm ye pur-lutf savārī

jannat bhī hamārī hai ye duniyā bhī hamārī

(1)

manzur yahi jab mujhe ai jaan-e-jahan hai

jo mera muqaddar hai wo ab mujh pe 'ayan hai

nakaam raha aah mera jazba-e-ulfat

hisse mein mere aai hai mahrumi-o-hasrat

likkha hai jo taqdir mein wo ho ke rahega

ab tak hai magar dil mein wahi teri mohabbat

rahti hai mere samne har dam teri surat

go wasl ki ummid tujhe saunp chuka hun

us par bhi teri yaad ka paband-e-wafa hun

kuchh aur bhi kahna hai magar teri raza se

ghoDe pe chalen sair ka kuchh lutf to aae

(2)

ye sun ke jabin jhuk gai us shoKH-ada ki

nazren bhi jhukin jin mein ra'unat thi bala ki

dekha jo zara meri taraf aankh uTha kar

kuchh aa hi gaya rahm mere haal-e-zabun par

puchho na kuchh us waqt dil-e-zar ka 'alam

itne mein hui mujh pe 'inayat ki barish

manzur hui meri ye chhoTi si guzarish

ab raKHsh par hum baiThenge wo hogi mere pas

qurbat se hamein hoga mohabbat ka bhi ehsas

us sa'at-e-nadir ko main samjhunga ghanimat

kya jaane ki aa jae usi roz qayamat

(3)

phir baiTh gai mere hi ghoDe pe wo tannaz

par lag gae dil ko bhi hua mail-e-parwaz

phir mujh ko mili meri wo gum-gashta jawani

mazi tha mere waste ab ek kahani

jo bit chuka mere liye bit chuka tha

kyon sochta yun karta to ho sakti thi ye baat

ab sud-o-ziyan ke the kahan dil mein KHayalat

ye kahiye ki qismat ne diya ab to mera sath

ja sakti thi warna wo mera chhoD ke bhi hath

kya mujh pe guzarni thi bigaD jata agar kaam

ab raKHsh pe baiThi hai mere sath wo gulfam

(4)

mana ki mila jo wo tamanna se hai kamtar

sab kuchh to nahin hota kisi ko bhi mayassar

mahbub ke pahlu mein ye kya kam thi sawari

us waqt meri ruh pe tha kaif sa tari

duniya ki har ek chiz thi raqsan mere aage

socha ki kiya karte hain sab log riyazat

kitne hain magar jin ke qadam chum le nusrat

takmil kahan pate hain duniya mein sabhi kaam

aaghaz to aasan hai dushwar hai anjam

socha tha hamesha wo mere pas rahegi

ab raKHsh pe hai sath chalo ye bhi hai kafi

(5)

hone ko to hote hain kai dil mein 'azaim

har 'azm ki takmil kahan hoti hai daim

ho lakh kisi kaam se insan ko lagawaT

kis kaam mein aati nahin darpesh rukawaT

sad-shukr ki ji bhar ke use dekh raha hun

leader ko zara dekhiye kya milta hai in'am

mar jaane pe chhap jaega aKHbar mein bas nam

jaanbaz sipahi ko ye hota hai mayassar

khodega pas-e-marg koi nam lahad par

leader ka hai ye haal sipahi ka ye anjam

main KHush hun ki donon se hai baDh kar mera in'am

(6)

ai qulzum-e-afkar mein Dube hue sha'ir

alfaz se tu she'r banane mein hai mahir

hai tera qalam husn-e-jahan-tab ka mazhar

de sakta hai jazbaat ko alfaz ka paikar

bhar deta hai alfaz ke paikar mein tarannum

mana ki baDi chiz hai ye kaam hai mushkil

kya KHud bhi magar tujh ko hai ne'mat koi hasil

juz 'usrat-o-adbar tere pas hi kya hai

kya tishna-labi hi teri kawish ka sila hai

ye man liya zauq-e-suKHan se hun main 'ari

lekin teri qimat mein kahan aisi sawari

(7)

but-gar se kaho tu ne bhi ki fan ki 'ibaadat

rakhta hai fan-e-sang-tarashi mein mahaarat

'wenus' ka ye but jis ko samajhta hai tu shahkar

rakhta hai kashish is se to baDh kar wo tarahdar

is par bhi hai tu shad to kyon mujh ko ho afsos

ai mahir-e-mausiqi zara tujh se karun baat

is fan ki 'ibaadat mein hui waqf teri zat

afsos ki bas itni hi milti hai tujhe dad

kar sakta hai tu saz ki jhankar se dil shad

is par bhi ye mushkil ki badal jate hain me'yar

hai 'ishq ka ye faiz ki ham-dosh hai dil-dar

(8)

kya Thik hai insan ke liye us ko KHabar kya

manzur agar katib-e-taqdir ko hota

ho jati yahin wasl ki ne'mat bhi mayassar

lekin koi na-'aqibat-andesh ho kyunkar

insan ko andesha-e-'uqba bhi hai lazim

ho jata agar zist mein pura mera mansha

mil jati yahin mujh ko meri jaan-e-tamanna

'uqba ke liye phir koi rahta na sahaara

sad-shukr ki kashti se raha dur kinara

ho lene do ab raKHsh pe dam bhar mujhe mahzuz

mahbub bhi mahfuz hai 'uqba bhi hai mahfuz

(9)

KHamosh thi wo rashk-e-qamar ghairat-e-firdaus

mahaul tha mere liye ham-surat-e-firdaus

wo mah-laqa mujh se thi us waqt baghal-gir

aisi hi hua karti hai firdaus ki taswir

mumkin hai ki ban jaen ye lamhat dawami

baiThe hi rahen raKHsh pe ta-roz-e-qayamat

har waqt rahe samne wo chand si surat

arman bhi nikalte rahen hasrat bhi ho baqi

ban jaega firdaus yahi 'alam-e-KHaki

hogi na kabhi KHatm ye pur-lutf sawari

jannat bhi hamari hai ye duniya bhi hamari