husn-e-kaamil

vo latīf-paikar-o-ḳhush-adā hai kuchh aisī dilkash-o-dilrubā

ruḳh-e-shab pe nuur sā jis tarah kabhī daf'atan ho bikhar gayā

vo ruḳh-e-jamīl hai dil-nashīñ vo nigāh-e-nāz hai surmagīñ

vo kuchh is balā kī hai dilrubā ki har ek 'uzv hai ḳhushnumā

vo hai sarv-qāmat-o-gul-badan har adā meñ us kī hai bāñkpan

use husn aisā 'atā huā ki jo āftāb se hai sivā

vo gudāz 'āriz-e-ahmarīñ vo darāz gesū-e-'ambarīñ

hai bahār-e-nāz vo nāznīñ koī kah de us meñ kamī hai kyā

vo jo but hai dushman-e-dīn-o-jāñ kabhī hotā aisā na dil-sitāñ

ye jo rang hai ruḳh-o-zulf kā kam-o-besh hotā agar zarā

ruḳh-e-pur-fusūñ kī chamak-damak dil-e-pur-sukūñ kī hai ik jhalak

ye hasīn chehra-e-ḳhushnumā hai ik aa.ina dil-e-sāf kā

vo jabīn-e-dāġh-dih-e-qamar pe ziyā-e-husn hai jalva-gar

vo latīf-'āriz-e-kaif-zā pe hai ik tabassum-e-jāñ-fazā

ye tabassum-e-lab-e-gul-fashāñ hai bahār-e-zīst kī dāstāñ

hai jabīñ se nuur jo rūnumā vo hai partav-e-dil-e-be-riyā

ye jamāl-o-husn-o-shaguftagī haiñ dalīl tīnat-e-pāk kī

ye nishān kahte haiñ barmalā ki vo lāla-fām hai bā-safā

wo latif-paikar-o-KHush-ada hai kuchh aisi dilkash-o-dilruba

ruKH-e-shab pe nur sa jis tarah kabhi daf'atan ho bikhar gaya

wo ruKH-e-jamil hai dil-nashin wo nigah-e-naz hai surmagin

wo kuchh is bala ki hai dilruba ki har ek 'uzw hai KHushnuma

wo hai sarw-qamat-o-gul-badan har ada mein us ki hai bankpan

use husn aisa 'ata hua ki jo aaftab se hai siwa

wo gudaz 'ariz-e-ahmarin wo daraaz gesu-e-'ambarin

hai bahaar-e-naz wo naznin koi kah de us mein kami hai kya

wo jo but hai dushman-e-din-o-jaan kabhi hota aisa na dil-sitan

ye jo rang hai ruKH-o-zulf ka kam-o-besh hota agar zara

ruKH-e-pur-fusun ki chamak-damak dil-e-pur-sukun ki hai ek jhalak

ye hasin chehra-e-KHushnuma hai ek aaina dil-e-saf ka

wo jabin-e-dagh-dih-e-qamar pe ziya-e-husn hai jalwa-gar

wo latif-'ariz-e-kaif-za pe hai ek tabassum-e-jaan-faza

ye tabassum-e-lab-e-gul-fashan hai bahaar-e-zist ki dastan

hai jabin se nur jo runuma wo hai partaw-e-dil-e-be-riya

ye jamal-o-husn-o-shaguftagi hain dalil tinat-e-pak ki

ye nishan kahte hain barmala ki wo lala-fam hai ba-safa