jab haathii nahaate hai.n

jab hāthī nahāte haiñ us vaqt

ham dekhte haiñ sirf

ek chhatrī jaisī siyāh pusht

aur ek ubhrī huī suuñD

pipe kī tarah

ab machhlī shurū' kartī hai raqs

us ke qavī-ul-jussa pairoñ ke atrāf

ghās-phūs

gudgudātī hai us kī bhīgī khaal ko

apne chītoñ bheḌiyoñ

aur laark parindoñ ke saath jañgalāt

us kī chhoTī chhoTī āñkhoñ meñ

samā jaate haiñ

surḳh dhuul us kī pusht par chamaktī hai

jaise tāñbe ke saath sonā

shāmil ho

gadlā tālāb bahtā hai saaf suthrā ho kar

jaise ek jañglī aabjū

jab hāthī nahāte haiñ

to hameñ apne tehvār nihāyat mā'mūlī

dikhā.ī dete haiñ

murassā ziin pahan kar hāthī ḳhush nahīñ hote

aap dekh sakte haiñ unheñ

tehvār ke julūs meñ bhī aañsū bahāte

hāthiyoñ aur insānoñ kī taqdīroñ

kā mātam karte

jab hāthī nahāte haiñ

to un kī suuñD se guzar kar

mausam-e-garmā ġhā.eb ho jaatā hai

aur phir aatā hai monsōn

jañglī chāñdnī guzartī hai

un kī āñkhoñ se ho kar

tālāb meñ Duube hue us ke jism se

paanī gaane lagtā hai raag hinDol

phūloñ se pur-bahār hue

jangal kī shadīd ḳhushbū

dīvāna banā detī hai insānoñ ko

mohabbat toḌtī hai apnī zanjīreñ

āzādī bigul bajātī hai

aur harf-e-tahajjī uThātā hai apnī suuñD

mausam-e-bahār ko

ḳhush-āmdīd kahne

jab hathi nahate hain us waqt

hum dekhte hain sirf

ek chhatri jaisi siyah pusht

aur ek ubhri hui sunD

pipe ki tarah

ab machhli shuru' karti hai raqs

us ke qawi-ul-jussa pairon ke atraf

ghas-phus

gudgudati hai us ki bhigi khaal ko

apne chiton bheDiyon

aur lark parindon ke sath jangalat

us ki chhoTi chhoTi aankhon mein

sama jate hain

surKH dhul us ki pusht par chamakti hai

jaise tanbe ke sath sona

shamil ho

gadla talab bahta hai saf suthra ho kar

jaise ek jangli aabju

jab hathi nahate hain

to hamein apne tehwar nihayat ma'muli

dikhai dete hain

murassa zin pahan kar hathi KHush nahin hote

aap dekh sakte hain unhen

tehwar ke julus mein bhi aansu bahate

hathiyon aur insanon ki taqdiron

ka matam karte

jab hathi nahate hain

to un ki sunD se guzar kar

mausam-e-garma ghaeb ho jata hai

aur phir aata hai monsoon

jangli chandni guzarti hai

un ki aankhon se ho kar

talab mein Dube hue us ke jism se

pani gane lagta hai rag hinDol

phulon se pur-bahaar hue

jangal ki shadid KHushbu

diwana bana deti hai insanon ko

mohabbat toDti hai apni zanjiren

aazadi bigul bajati hai

aur harf-e-tahajji uThata hai apni sunD

mausam-e-bahaar ko

KHush-amdid kahne