jab merii yaad

jab merī maddham paḌtī yaad

aadhī raat ke baa'd chalne vaalī tramoñ kī tarah

sirf baḌe isTeshnoñ par rukne lagegī

maiñ tumheñ bhūlūñgā nahīñ

maiñ yaad karūñgā

tumhārī āñkhoñ kī ḳhāmoshī

aur kabhī ḳhatm na hone vaalī shaam ko

apne kandhe par tumhārī ghuTī ghuTī siskiyoñ ko

jinheñ barf ke gāloñ kī tarah

uñgliyoñ se jhāḌā nahīñ jā saktā

ruḳhsat kī ghaḌī aa.ī

maiñ bichhaḌ kar tum se duur chalā gayā

zindagī meñ aisā hotā hī rahtā hai

lekin kisī raat pahuñch jā.eñgī kisī kī uñgliyāñ

tumhāre bāloñ ko sahlāne

kaḌe kosoñ kā safar kartī

merī dūr-uftāda uñgliyāñ

jab meri maddham paDti yaad

aadhi raat ke ba'd chalne wali tramon ki tarah

sirf baDe isTeshnon par rukne lagegi

main tumhein bhulunga nahin

main yaad karunga

tumhaari aankhon ki KHamoshi

aur kabhi KHatm na hone wali sham ko

apne kandhe par tumhaari ghuTi ghuTi siskiyon ko

jinhen barf ke galon ki tarah

ungliyon se jhaDa nahin ja sakta

ruKHsat ki ghaDi aai

main bichhaD kar tum se dur chala gaya

zindagi mein aisa hota hi rahta hai

lekin kisi raat pahunch jaengi kisi ki ungliyan

tumhaare baalon ko sahlane

kaDe koson ka safar karti

meri dur-uftada ungliyan