luknat

luknat mā'zūrī nahīñ

ye to ek tarz-e-guftugū hai

luknat ḳhāmoshī hai

jo dar aatī hai

lafz aur us ke mā'nā ke darmiyān

bilkul usī tarah jaise lūle-pan

kī ḳhāmoshī jo dar aatī hai

lafz aur ta'āmmul ke darmiyān

luknat zabān par muqaddam hai

yā muaḳhḳhar

ye sirf ek lahja hai

yā apne aap meñ ek zabān

ye savālāt aise haiñ

ki māhirīn-e-lissniyāt bhī haklāne lagte haiñ

ham haklāte haiñ to goyā

ham pesh karte haiñ qurbānī

ḳhudāvand-e-ma'ānī ke huzūr

tamām log jab luknat-zada hoñ

to luknat ban jaatī hai un kī mādarī zabān

jis tarah ab hamārā mu'āmla hai

shāyad ḳhudā bhī zarūr haklāyā hogā

us vaqt

jab us ne insān kī taḳhlīq kī hogī

yahī vaj.h hai ki insānoñ ke tamām alfāz

muḳhtalif-ul-ma'ānī haiñ

yahī vaj.h hai ki jo kuchh bhī vo kahtā hai

apnī 'ibādatoñ se le kar apne ahkāmāt tak

haklā kar kahtā hai

shā'irī kī tarah

luknat ma'zuri nahin

ye to ek tarz-e-guftugu hai

luknat KHamoshi hai

jo dar aati hai

lafz aur us ke ma'na ke darmiyan

bilkul usi tarah jaise lule-pan

ki KHamoshi jo dar aati hai

lafz aur ta'ammul ke darmiyan

luknat zaban par muqaddam hai

ya muaKHKHar

ye sirf ek lahja hai

ya apne aap mein ek zaban

ye sawalat aise hain

ki mahirin-e-lissniyat bhi haklane lagte hain

hum haklate hain to goya

hum pesh karte hain qurbani

KHudawand-e-ma'ani ke huzur

tamam log jab luknat-zada hon

to luknat ban jati hai un ki madari zaban

jis tarah ab hamara mu'amla hai

shayad KHuda bhi zarur haklaya hoga

us waqt

jab us ne insan ki taKHliq ki hogi

yahi wajh hai ki insanon ke tamam alfaz

muKHtalif-ul-ma'ani hain

yahi wajh hai ki jo kuchh bhi wo kahta hai

apni 'ibaadaton se le kar apne ahkaamat tak

hakla kar kahta hai

sha'iri ki tarah