miraa safar to kaThin safar hai

mirā safar to kaThin safar hai

tavīl muddat lagegī is meñ

maiñ raushnī kī shu'ā'-e-avval ke rath pe ho kar savār aayā

safar ye jaarī rakhā hai maiñ ne

tamām duniyāoñ ke bayābānoñ jangaloñ meñ

bahut se sayyāroñ aur sitāroñ pe

chhoḌ aayā nuqūsh-e-pā maiñ

jo rāsta sab se duur kā hai

mujhe tirā qurb 'atā karegā

yahī to vo saḳht tarbiyat hai

jo mere naġhme kī sādgī kā surāġh degī

'ajīb hai ye musāfirat bhī

yahāñ musāfir ko

ajnabī chaukhaToñ pe

dastak hī dete dete

pahuñchnā hogā ḳhud apne dar par

hameñ to dil ke sanam-kade tak

rasā.ī paane kī aarzū meñ

haiñ jitne 'ālam varā-e-bātin

tavāf karnā paḌegā un kā

mirī nigāheñ bhaTak rahī thiiñ

chahār jānib

bas is se pahle ki maiñ ne

āñkhoñ ko band kar ke

kiyā thā iqrār

tū yahāñ hai

tirā ye kahnā ki maiñ huuñ

be-shak

yaqīñ kā ik sail-e-be-karāñ thā

ki us meñ mere savāl saare

tamām chīḳheñ

hazār chashmoñ ke ashk ban kar

pighal ga.e haiñ

mera safar to kaThin safar hai

tawil muddat lagegi is mein

main raushni ki shu'a'-e-awwal ke rath pe ho kar sawar aaya

safar ye jari rakha hai main ne

tamam duniyaon ke bayabanon jangalon mein

bahut se sayyaron aur sitaron pe

chhoD aaya nuqush-e-pa main

jo rasta sab se dur ka hai

mujhe tera qurb 'ata karega

yahi to wo saKHt tarbiyat hai

jo mere naghme ki sadgi ka suragh degi

'ajib hai ye musafirat bhi

yahan musafir ko

ajnabi chaukhaTon pe

dastak hi dete dete

pahunchna hoga KHud apne dar par

hamein to dil ke sanam-kade tak

rasai pane ki aarzu mein

hain jitne 'alam wara-e-baatin

tawaf karna paDega un ka

meri nigahen bhaTak rahi thin

chahaar jaanib

bas is se pahle ki main ne

aankhon ko band kar ke

kiya tha iqrar

tu yahan hai

tera ye kahna ki main hun

be-shak

yaqin ka ek sail-e-be-karan tha

ki us mein mere sawal sare

tamam chiKHen

hazar chashmon ke ashk ban kar

pighal gae hain