naadaanii

jis qadar bhī 'ilm yā daulat kisī ke paas hai

apnī yaktā.ī kā utnā hī use ehsās hai

ḳhush hai daanā vo samajhtā hai ki huuñ dānā-e-rāz

ahl-e-sarvat ko to apne māl-o-zar par naaz hai

be-navā ḳhush hai ki ḳhud us kā ḳhudā dam-sāz hai

dekhiye mastī meñ kaise raqs kartā hai gadā

ek dīvāna bhī hai apnī jagah farmāñ-ravā

kīmiyā-gar chāhe muflis kyoñ na ho masrūr hai

shā'ir-e-ġhamgīñ bhī she'roñ ke nashe meñ chuur hai

jis ko dekho us ke dil meñ ik ḳhayāl-e-ḳhām hai

dekhiye kitnā takabbur is jahāñ meñ 'aam hai

aadmī rahtā hai aksar ek jazbe kā shikār

ik faqat ummīd par hai zindagī kā inhisār

ek bachcha gudgudāne se bhī ḳhush ho jā.egā

ek mā'mūlī khilaunā us kā dil bahalā.egā

phir javānī meñ koī ḳhush-tar khilaunā chāhiye

ye khilaunā kuchh pasandīda bhī honā chāhiye

chāhtā hai aur aage jā ke vo atlas harīr

yā koī tasbīh le kar kheltā hai mard-e-pīr

al-ġharaz har vaqt us ke dil ko bahlātā hai khel

thak ke rah jaatā hai āḳhir ḳhatm ho jaatā hai khel

jis qadar bhi 'ilm ya daulat kisi ke pas hai

apni yaktai ka utna hi use ehsas hai

KHush hai dana wo samajhta hai ki hun dana-e-raaz

ahl-e-sarwat ko to apne mal-o-zar par naz hai

be-nawa KHush hai ki KHud us ka KHuda dam-saz hai

dekhiye masti mein kaise raqs karta hai gada

ek diwana bhi hai apni jagah farman-rawa

kimiya-gar chahe muflis kyon na ho masrur hai

sha'ir-e-ghamgin bhi she'ron ke nashe mein chur hai

jis ko dekho us ke dil mein ek KHayal-e-KHam hai

dekhiye kitna takabbur is jahan mein 'am hai

aadmi rahta hai aksar ek jazbe ka shikar

ek faqat ummid par hai zindagi ka inhisar

ek bachcha gudgudane se bhi KHush ho jaega

ek ma'muli khilauna us ka dil bahalaega

phir jawani mein koi KHush-tar khilauna chahiye

ye khilauna kuchh pasandida bhi hona chahiye

chahta hai aur aage ja ke wo atlas harir

ya koi tasbih le kar khelta hai mard-e-pir

al-gharaz har waqt us ke dil ko bahlata hai khel

thak ke rah jata hai aaKHir KHatm ho jata hai khel