sanaa-o-tasbiih tark kar de

sanā-o-tasbīh tark kar de

ye kis kī taqdīs ho rahī hai

tū jis ko mā'bad samajh rahā hai

kisī bhī mahbas se kam nahīñ hai

tū apnī āñkheñ tū khol nādāñ

ki terā mā'būd sāmne hai

jahāñ pe dahqāñ kā hal hai chaltā

vahīñ pe maujūd vo milegā

jahāñ pe patthar ke kūTne meñ

ġharīb mazdūr kā pasīna

mudām ghultā hī jā rahā hai

vahāñ bhī jalva usī kā hogā

vo saḳht garmī kī dhuup ho

yā phuvār sāvan kī paḌ rahī ho

libās tum us kā dekhte ho

qadam se sar tak hai gard oḌhe

utāro taqdīs kā libāda

shi'ār apnāo rāstī kā

tum us ke jaisā to ban ke dekho

zamīñ par aao

najāt āḳhir kahāñ milegī

hamāre aaqā ne

ḳhud hī kāñdhoñ pe rakh liyā hai

juā jo taḳhlīq kā ye hañs kar

to bañdh gayā hai hamāre dāman se

tā-qayāmat

murāqabe se ab aao bāhar

uThā ke rakkho ye ‘ūd-o-ambar

huā hī kyā jo tumhārī poshāk

jā-ba-jā se masak ga.ī hai

ki daaġh dhabboñ se bhar ga.ī hai

milo tum us se

jo jāñ-fishānī vo kar rahā hai

pasīna apnā bahā rahā hai

hai saath denā hameñ usī kā

sana-o-tasbih tark kar de

ye kis ki taqdis ho rahi hai

tu jis ko ma'bad samajh raha hai

kisi bhi mahbas se kam nahin hai

tu apni aankhen tu khol nadan

ki tera ma'bud samne hai

jahan pe dahqan ka hal hai chalta

wahin pe maujud wo milega

jahan pe patthar ke kuTne mein

gharib mazdur ka pasina

mudam ghulta hi ja raha hai

wahan bhi jalwa usi ka hoga

wo saKHt garmi ki dhup ho

ya phuwar sawan ki paD rahi ho

libas tum us ka dekhte ho

qadam se sar tak hai gard oDhe

utaro taqdis ka libaada

shi'ar apnao rasti ka

tum us ke jaisa to ban ke dekho

zamin par aao

najat aaKHir kahan milegi

hamare aaqa ne

KHud hi kandhon pe rakh liya hai

jua jo taKHliq ka ye hans kar

to bandh gaya hai hamare daman se

ta-qayamat

muraqabe se ab aao bahar

uTha ke rakkho ye ‘ud-o-ambar

hua hi kya jo tumhaari poshak

ja-ba-ja se masak gai hai

ki dagh dhabbon se bhar gai hai

milo tum us se

jo jaan-fishani wo kar raha hai

pasina apna baha raha hai

hai sath dena hamein usi ka