ثنا_و_تسبیح ترک کر دے

ثنا و تسبیح ترک کر دے

یہ کس کی تقدیس ہو رہی ہے

تو جس کو معبد سمجھ رہا ہے

کسی بھی محبس سے کم نہیں ہے

تو اپنی آنکھیں تو کھول ناداں

کہ تیرا معبود سامنے ہے

جہاں پہ دہقاں کا ہل ہے چلتا

وہیں پہ موجود وہ ملے گا

جہاں پہ پتھر کے کوٹنے میں

غریب مزدور کا پسینہ

مدام گھلتا ہی جا رہا ہے

وہاں بھی جلوہ اسی کا ہوگا

وہ سخت گرمی کی دھوپ ہو

یا پھوار ساون کی پڑ رہی ہو

لباس تم اس کا دیکھتے ہو

قدم سے سر تک ہے گرد اوڑھے

اتارو تقدیس کا لبادہ

شعار اپناؤ راستی کا

تم اس کے جیسا تو بن کے دیکھو

زمیں پر آؤ

نجات آخر کہاں ملے گی

ہمارے آقا نے

خود ہی کاندھوں پہ رکھ لیا ہے

جوا جو تخلیق کا یہ ہنس کر

تو بندھ گیا ہے ہمارے دامن سے

تا قیامت

مراقبے سے اب آؤ باہر

اٹھا کے رکھو یہ عود و عنبر

ہوا ہی کیا جو تمہاری پوشاک

جابجا سے مسک گئی ہے

کہ داغ دھبوں سے بھر گئی ہے

ملو تم اس سے

جو جانفشانی وہ کر رہا ہے

پسینہ اپنا بہا رہا ہے

ہے ساتھ دینا ہمیں اسی کا