tire 'ataa ne mujhe to davaam baKHsh diyaa

tire 'atā ne mujhe to davām baḳhsh diyā

tirā hai kitnā karam

ki bārhā mire kamzor zarf hastī ko

tū ḳhālī kartā hai

aur phir hayāt-e-tāza se

bhartā bhī tū hī rahtā hai

jo koh-o-dasht meñ

tū ne bikher rakkhī hai

har ek samt ye nannhī bāñsurī kī sadā

tirī hī saañs ke naġhmoñ kī hai mahak is meñ

ki tere haath ke ik lams-e-jāvedāñ ke tufail

milā hai dil ko mire vo surūr-e-be-pāyāñ

mire laboñ pe machalte haiñ jāñ-fazā naġhme

haiñ chhoTe haath mire kis tarah sameTeñge

tirī 'atāoñ ko jo be-hisāb haiñ yā-rab

zamāne aate haiñ jaate haiñ

mere dāman meñ

hamesha hotā hī rahtā tire karam kā nuzūl

ye zarf bhartā hī rahtā hai yūñhī sub.h-o-shām

ki tishnagī mirī har lamha baḌhtī jaatī hai

tere 'ata ne mujhe to dawam baKHsh diya

tera hai kitna karam

ki barha mere kamzor zarf hasti ko

tu KHali karta hai

aur phir hayat-e-taza se

bharta bhi tu hi rahta hai

jo koh-o-dasht mein

tu ne bikher rakkhi hai

har ek samt ye nannhi bansuri ki sada

teri hi sans ke naghmon ki hai mahak is mein

ki tere hath ke ek lams-e-jawedan ke tufail

mila hai dil ko mere wo surur-e-be-payan

mere labon pe machalte hain jaan-faza naghme

hain chhoTe hath mere kis tarah sameTenge

teri 'ataon ko jo be-hisab hain ya-rab

zamane aate hain jate hain

mere daman mein

hamesha hota hi rahta tere karam ka nuzul

ye zarf bharta hi rahta hai yunhi subh-o-sham

ki tishnagi meri har lamha baDhti jati hai