tire hukm-e-naGma-saraa.ii se

tire hukm-e-naġhma-sarā.ī se

mujhe ye huā hai gumāñ kabhī

ki kahīñ dhḌaknā na chhoḌ de

mirā dil hujūm-e-ġhurūr se

tire chehre ko maiñ huuñ dekhtā

mirī āñkheñ hotī haiñ ashk-bār

mirī zindagī kī musībateñ mire rāste kī aziyyateñ

sabhī sh’r-o-naġhma meñ Dhaltī haiñ

ye mirī 'aqīdat-e-be-panāh

hai misāl-e-tā.ir-e-shādmāñ

jo uḌaan bhartā hai paar dariyā ke jaane ko

vo paroñ ko apne hai kholtī

mujhe hai ḳhabar mire giit bhī

tire dil ko khīñchte rahte haiñ

mujhe hai yaqīn tire sāmne

maiñ jo aatā huuñ

to bas ik muġhannī hī rahtā huuñ

mire naġhmoñ ke be-kanār par

tire paañv chūmte haiñ dam-ba-dam

ye mirā nasīb kabhī na thā

hai kuchh aisā ‘ālam-e-be-ḳhudī

ki ḳhud apne naġhmoñ kī mastī meñ

maiñ tujhe hī dost pukār uThā

tū jo merā aaqā hai aur ḳhudā

tere hukm-e-naghma-sarai se

mujhe ye hua hai guman kabhi

ki kahin dhDakna na chhoD de

mera dil hujum-e-ghurur se

tere chehre ko main hun dekhta

meri aankhen hoti hain ashk-bar

meri zindagi ki musibaten mere raste ki aziyyaten

sabhi sh’r-o-naghma mein Dhalti hain

ye meri 'aqidat-e-be-panah

hai misal-e-tair-e-shadman

jo uDan bharta hai par dariya ke jaane ko

wo paron ko apne hai kholti

mujhe hai KHabar mere git bhi

tere dil ko khinchte rahte hain

mujhe hai yaqin tere samne

main jo aata hun

to bas ek mughanni hi rahta hun

mere naghmon ke be-kanar par

tere panw chumte hain dam-ba-dam

ye mera nasib kabhi na tha

hai kuchh aisa ‘alam-e-be-KHudi

ki KHud apne naghmon ki masti mein

main tujhe hi dost pukar uTha

tu jo mera aaqa hai aur KHuda