yaad-e-guzishta

shahr ek rūd-e-pur-ḳharosh ke kināre hai

apne bāġh-o-rāġh-o-nūr-bār-shab se pur-ḳharosh

aur us meñ merā dil

hai asīr-e-dām ek mard-e-pur-ġhurūr kā

ruud kā kinār jis ne us ke aur mere liye

apne bāzuoñ ko khol kar rakhā thā sālahā

jis ke sāhiloñ pe jis ke kunj kunj ke tale

us ne mere bosa-hā-e-lab churā.e bārhā

māhtāb hai gavāh

maiñ ne us ke sang-e-dil ko apne sehr-e-'ishq se

kaise narm kar diyā

māhtāb jāntā hai us nigah kī be-ruḳhī meñ

ashk-e-shauq kis tarah

jhilmilā uThā

be-karāñ samundaroñ meñ

ham ne ik safīne par safar kiyā

nīm-shab kī ḳhāmushī ko toḌ kar

aur hamārī bazm par

kī nujūm ne nazar

tifl kī tarah mire kinār meñ jo so gayā

maiñ ne apne lab rakhe the us kī band aañkh par

ġharq ho gayā jo pairahan mirā

us ne jhuk ke dast-e-āb se use chhuḌā liyā

aah aaj maiñ vahī huuñ aur ye ḳhalvat-o-sukūt

shahr-e-pur-ḳharosh tujh ko yaad kar rahī huuñ maiñ

jis se basta dil mirā hai tū use 'azīz rakh

us kī yaad se dil apnā shaad kar rahī huuñ maiñ

shahr ek rud-e-pur-KHarosh ke kinare hai

apne bagh-o-ragh-o-nur-bar-shab se pur-KHarosh

aur us mein mera dil

hai asir-e-dam ek mard-e-pur-ghurur ka

rud ka kinar jis ne us ke aur mere liye

apne bazuon ko khol kar rakha tha salaha

jis ke sahilon pe jis ke kunj kunj ke tale

us ne mere bosa-ha-e-lab churae barha

mahtab hai gawah

main ne us ke sang-e-dil ko apne sehr-e-'ishq se

kaise narm kar diya

mahtab jaanta hai us nigah ki be-ruKHi mein

ashk-e-shauq kis tarah

jhilmila uTha

be-karan samundaron mein

hum ne ek safine par safar kiya

nim-shab ki KHamushi ko toD kar

aur hamari bazm par

ki nujum ne nazar

tifl ki tarah mere kinar mein jo so gaya

main ne apne lab rakhe the us ki band aankh par

gharq ho gaya jo pairahan mera

us ne jhuk ke dast-e-ab se use chhuDa liya

aah aaj main wahi hun aur ye KHalwat-o-sukut

shahr-e-pur-KHarosh tujh ko yaad kar rahi hun main

jis se basta dil mera hai tu use 'aziz rakh

us ki yaad se dil apna shad kar rahi hun main