zamiin tang ho rahii hai

zamīn tang ho rahī hai

hameñ āḳhirī rāste par dhakel rahī hai

is meñ se guzarne ke liye ham apnā ek ek uzv alag kar rahe haiñ

zamīn hameñ jakaḌ rahī hai

kaash ham gandum hote is zamīn par marte aur jī uThte

sochtā huuñ

kaash zamīn hamārī maañ hotī

ham par rahm khā saktī

ham jaate aur ḳhvāboñ ke saath pattharoñ par naqsh ho jaate

ā.inoñ kī tarah un ke chehroñ ko dekhte

jinheñ hamāre baa'd is zamīn ke liye jaan denī hai

ham un ke bachchoñ kī 'iid par rote haiñ

ham un ke chehre dekh rahe haiñ

jo hamāre bachchoñ ko khiḌkiyoñ se bāhar pheñkeñge āḳhirī ḳhalā meñ

hamārā sitārā ā.inoñ ko āvezāñ karegā

kahāñ jā.eñge ham vahāñ se

jahāñ sarhadeñ ḳhatm ho jā.eñgī

kahāñ parvāz kareñge parinde āḳhirī āsmān ke baa'd

kahāñ so.eñge āḳhirī āḳhirī havā meñ saañs lene ke baa'd

ham apne naam qurmuzī dhund se likheñge

ham apnī nazmoñ ke haath kaaT deñge

taaki un kā iḳhtitām hamārī jild par ho

yahīñ mareñge ham

isī āḳhirī rāste meñ

aur yahīñ hamāre ḳhuun meñ numū pā.eñge zaitūn ke daraḳht

zamin tang ho rahi hai

hamein aaKHiri raste par dhakel rahi hai

is mein se guzarne ke liye hum apna ek ek uzw alag kar rahe hain

zamin hamein jakaD rahi hai

kash hum gandum hote is zamin par marte aur ji uThte

sochta hun

kash zamin hamari man hoti

hum par rahm kha sakti

hum jate aur KHwabon ke sath pattharon par naqsh ho jate

aainon ki tarah un ke chehron ko dekhte

jinhen hamare ba'd is zamin ke liye jaan deni hai

hum un ke bachchon ki 'id par rote hain

hum un ke chehre dekh rahe hain

jo hamare bachchon ko khiDkiyon se bahar phenkenge aaKHiri KHala mein

hamara sitara aainon ko aawezan karega

kahan jaenge hum wahan se

jahan sarhaden KHatm ho jaengi

kahan parwaz karenge parinde aaKHiri aasman ke ba'd

kahan soenge aaKHiri aaKHiri hawa mein sans lene ke ba'd

hum apne nam qurmuzi dhund se likhenge

hum apni nazmon ke hath kaT denge

taki un ka iKHtitam hamari jild par ho

yahin marenge hum

isi aaKHiri raste mein

aur yahin hamare KHun mein numu paenge zaitun ke daraKHt