بے درد سر بہ سجدۂ الفت فرو نہ ہو

بے درد سر بہ سجدۂ الفت فرو نہ ہو

جوں شمع غوطہ داغ میں کھا گر وضو نہ ہو

دل دے کف تغافل ابروے یار میں

آئینہ ایسے طاق پہ گم کر کہ تو نہ ہو

زلف خیال نازک و اظہار بے قرار

یارب بیان شانہ کش گفتگو نہ ہو

تمثال ناز جلوۂ نیرنگ اعتبار

ہستی عدم ہے آئینہ گر رو برو نہ ہو

مژگاں خلیدۂ رگ ابر بہار ہے

نشتر بہ مغز پنبۂ مینا فرو نہ ہو

عرض نشاط دید ہے مژگان انتظار

یارب کہ خار پیرہن آرزو نہ ہو

واں پر فشان دام نظر ہوں جہاں اسدؔ

صبح بہار بھی قفس رنگ و بو نہ ہو