کو بیابان تمنا و کجا جولان عجز

کو بیابان تمنا و کجا جولان عجز

آبلے پا کے ہیں یاں رفتار کو دندان عجز

ہو قبول کم نگاہی تحفۂ اہل نیاز

اے دل و اے جان ناز اے دین و اے ایمان عجز

بوسۂ پا انتخاب بدگمانی ہاے حسن

یاں ہجوم عجز سے تا سجدہ ہے جولان عجز

حسن کو غنچوں سے ہے پوشیدہ چشمی ہاے ناز

عشق نے وا کی ہے ہر یک خار سے مژگان عجز

اضطراب نارسائی مایۂ شرمندگی

ہے عرق ریزی خجلت جوشش طوفان عجز

وہ جہاں مسند نشین بارگاہ ناز ہو

قامت خوباں ہو محراب نیازستان عجز

بس کہ بے پایاں ہے صحراے محبت اے اسدؔ

گرد باد اس راہ کا ہے عقدۂ پیمان عجز