شفق بدعوی عاشق گواہ رنگیں ہے

شفق بدعوی عاشق گواہ رنگیں ہے

کہ ماہ دزد حناے کف نگاریں ہے

کرے ہے بادہ ترے لب سے کسب رنگ فروغ

خط پیالہ سراسر نگاہ گلچیں ہے

عیاں ہے پاے حنائی برنگ پر تو خور

رکاب روزن دیوار خانۂ زیں ہے

جبین صبح امید فسانہ گویاں پر

درازی رگ خواب بتاں خط چیں ہے

ہوا نشان سواد دیار حسن عیاں

کہ خط غبار زمیں خیز زلف مشکیں ہے

بجا ہے گر نہ سنے نالہ ہاے بلبل زار

کہ گوش گل نم شبنم سے پنبہ آگیں ہے

کبھی تو اس سر شوریدہ کی بھی داد ملے

کہ ایک عمر سے حسرت پرست بالیں ہے

نہ پوچھ کچھ سروسامان کاروبار اسدؔ

جنوں معاملہ بیدل فقیر مسکیں ہے

اسدؔ ہے نزع میں چل بے وفا براے خدا

مقام ترک حجاب و وداع تمکیں ہے