aur bhī kitne tarīqe haiñ bayān-e-ġham ke

muskurātī huī āñkhoñ ko to pur-nam na karo

aur bhi kitne tariqe hain bayan-e-gham ke

muskuraati hui aankhon ko to pur-nam na karo

ham to tire zikr kā hue juzv

tū ne hameñ kis tarah bhulāyā

hum to tere zikr ka hue juzw

tu ne hamein kis tarah bhulaya

marnā bhī nahīñ hai apne bas meñ

jiinā bhī azaab ho gayā hai

marna bhi nahin hai apne bas mein

jina bhi azab ho gaya hai

jaane mujh meñ hai kaun sī ḳhūbī

log rakhte haiñ mujh se bair bahut

jaane mujh mein hai kaun si KHubi

log rakhte hain mujh se bair bahut

'fitrat' dil-e-kaunain kī dhaḌkan to zarā sun

ye hazrat-e-insāñ hī kī azmat kā bayāñ hai

'fitrat' dil-e-kaunain ki dhaDkan to zara sun

ye hazrat-e-insan hi ki azmat ka bayan hai

haa.e ye intizār kā 'ālam

tham ga.e vaqt ke qadam jaise

hae ye intizar ka 'alam

tham gae waqt ke qadam jaise

zindagī qaid-e-rivāyāt se ghabrātī hai

mauj-mastī meñ kināre se uchhal jaatī hai

zindagi qaid-e-riwayat se ghabraati hai

mauj-masti mein kinare se uchhal jati hai

husn-e-qismat se hamesha 'fitrat'

baḳht bedār rahā ḳhvāboñ meñ

husn-e-qismat se hamesha 'fitrat'

baKHt bedar raha KHwabon mein

dil-e-yazdāñ ko aa.e pyaar jin par

vo ġham insāñ ke siine meñ pale haiñ

dil-e-yazdan ko aae pyar jin par

wo gham insan ke sine mein pale hain

ai sukūt-e-shab-e-ġham mubārak tujhe

boltā hai qarīb-e-rag-e-jāñ koī

ai sukut-e-shab-e-gham mubarak tujhe

bolta hai qarib-e-rag-e-jaan koi

vahī nā-qadrī-e-abnā-e-jahāñ hai lekin

jāñ-nisārī vahī īmān-e-vafā aaj bhī hai

wahi na-qadri-e-abna-e-jahan hai lekin

jaan-nisari wahi iman-e-wafa aaj bhi hai

nazar hai be-zabānī kī zabāñ bhī

nazar par be-zabānī hai girāñ bhī

nazar hai be-zabani ki zaban bhi

nazar par be-zabani hai giran bhi

me'yār-e-dard-mandī-e-insāñ kā kyā kaheñ

jiine kī aarzū hameñ nang-e-vafā lagī

me'yar-e-dard-mandi-e-insan ka kya kahen

jine ki aarzu hamein nang-e-wafa lagi