huzūr aap takalluf meñ kyoñ paḌe hue haiñ

mare huoñ ke janam-din nahīñ manātā koī

huzur aap takalluf mein kyon paDe hue hain

mare huon ke janam-din nahin manata koi

tujhe pata thā maiñ tere baġhair kuchh bhī nahīñ

zarā taras bhī na aaya tujhe bichhaḌte hue

tujhe pata tha main tere baghair kuchh bhi nahin

zara taras bhi na aaya tujhe bichhaDte hue

pāgal kiyā hai ishq ne aadhā jo rah gayā

ab aadhe sar ke dard kā puurā marīz huuñ

pagal kiya hai ishq ne aadha jo rah gaya

ab aadhe sar ke dard ka pura mariz hun

hamārī ḳhair hai lekin bas ik guzārish hai

hamāre baad kisī se bhī yuuñ nahīñ karnā

hamari KHair hai lekin bas ek guzarish hai

hamare baad kisi se bhi yun nahin karna

pahle bhī mere gaañv meñ ghāyal haiñ tiin shaḳhs

āzār-e-āgahī kā maiñ chauthā marīz huuñ

pahle bhi mere ganw mein ghayal hain tin shaKHs

aazar-e-agahi ka main chautha mariz hun

hamāre dil se nikalte huoñ ko saat salām

vo is liye ki vo is habs meñ makīn rahe

hamare dil se nikalte huon ko sat salam

wo is liye ki wo is habs mein makin rahe

na mere paas tasallī na us ke paas aañsū

ḳhudā ke sāmne bebas khaḌe haiñ ham donoñ

na mere pas tasalli na us ke pas aansu

KHuda ke samne bebas khaDe hain hum donon

daad kab paate haiñ us 'mīr' kī dīvānī se

zang-ālūd taḳhayyul se kharoñche hue sher

dad kab pate hain us 'mir' ki diwani se

zang-alud taKHayyul se kharonche hue sher

pichhle janam kā koī ta'alluq thā us ke saath

dekhe baġhair mujh ko ḳhad-o-ḳhāl yaad the

pichhle janam ka koi ta'alluq tha us ke sath

dekhe baghair mujh ko KHad-o-KHal yaad the

ḳhauf is darja musallat thā tire baad 'hasan'

dil dhaḌaktā thā to ham ḳhud se lipaT jaate the

KHauf is darja musallat tha tere baad 'hasan'

dil dhaDakta tha to hum KHud se lipaT jate the

maiñ ka.ī kaam to dānista ġhalat kartā thā

taaki vo nuqs nikāle ki nahīñ aise kar

main kai kaam to danista ghalat karta tha

taki wo nuqs nikale ki nahin aise kar

maiñ bahut soch ke bichhḌā thā moharram meñ 'hasīb'

maiñ ne us shaḳhs ko rone kī suhūlat dī thī

main bahut soch ke bichhDa tha moharram mein 'hasib'

main ne us shaKHs ko rone ki suhulat di thi

laakh mīThe hoñ tire shahr ke chashme lekin

ham tire shahr ko ḳhush-āb nahīñ kah sakte

lakh miThe hon tere shahr ke chashme lekin

hum tere shahr ko KHush-ab nahin kah sakte

tumhāre husn kā sadqa utarnā lāzmī hai

so yuuñ karo kisī bachche ko māthā chūmne do

tumhaare husn ka sadqa utarna lazmi hai

so yun karo kisi bachche ko matha chumne do

ham aise log zaa.e.a ho rahe haiñ

ḳhudā chup-chāp dekhe jā rahā hai

hum aise log zaea ho rahe hain

KHuda chup-chap dekhe ja raha hai

hamārī vahshat kisī purāne khañDar ke aaseb kī amānat

hamārī ġhazleñ hamārī devī kī ek tirchhī nazar kā sadqa

hamari wahshat kisi purane khanDar ke aaseb ki amanat

hamari ghazlen hamari dewi ki ek tirchhi nazar ka sadqa

ḳhudā ke baad use mujh pe maan thā kyūñki

ḳhudā ke baad use maiñ hī pyaar kartā thā

KHuda ke baad use mujh pe man tha kyunki

KHuda ke baad use main hi pyar karta tha

zamāne-bhar kī duā.eñ mire liye thiiñ magar

maiñ chāhtā hī nahīñ thā ki sabr aa jaa.e

zamane-bhar ki duaen mere liye thin magar

main chahta hi nahin tha ki sabr aa jae

shāhzādī kī marzī hai lekin

mujh se achchhā ġhulām koī nahīñ

shahzadi ki marzi hai lekin

mujh se achchha ghulam koi nahin

hamāre aañsū kisī Thikāne to lag rahe haiñ

furāt ke bad-nasīb paanī kā kyā banegā

hamare aansu kisi Thikane to lag rahe hain

furaat ke bad-nasib pani ka kya banega

use batānā parinde use bulāte haiñ

use batānā ki shā.ir udaas hai us kā

use batana parinde use bulate hain

use batana ki shair udas hai us ka

ye saath gaañv meñ ek chhoTā sā kaam hai bas

mirī udāsī udaas mat ho maiñ aa rahā huuñ

ye sath ganw mein ek chhoTa sa kaam hai bas

meri udasi udas mat ho main aa raha hun

qasam hai tere taġhāful kī tujh se pahle mujhe

nahīñ pata thā ki ehsās-e-kamtarī kyā hai

qasam hai tere taghaful ki tujh se pahle mujhe

nahin pata tha ki ehsas-e-kamtari kya hai

hamī parem chand kī kahāniyoñ ke log haiñ

vo log jin kī umr ko udhār ne nigal liyā

hami parem chand ki kahaniyon ke log hain

wo log jin ki umr ko udhaar ne nigal liya

us ke me.aar par ḳhudā laa.e

us nazar tak to aa ga.e haiñ ham

us ke mear par KHuda lae

us nazar tak to aa gae hain hum

hamāre baad koī sar-parast mil na sakā

yatīm-ḳhāne meñ rakkhā gayā mohabbat ko

hamare baad koi sar-parast mil na saka

yatim-KHane mein rakkha gaya mohabbat ko

tumhārī āñkhoñ pe nazm kahne se pahle ham ne bhigoī āñkheñ

sunā huā thā zamīn nam ho to achchhī hotī hai kāsht-kārī

tumhaari aankhon pe nazm kahne se pahle hum ne bhigoi aankhen

suna hua tha zamin nam ho to achchhi hoti hai kasht-kari

tere ḳhvāboñ ke pīchhe bhāgī thiiñ

merī āñkhoñ meñ paḌ ga.e chhāle

tere KHwabon ke pichhe bhagi thin

meri aankhon mein paD gae chhaale

tumhārā husn ye khultā hai jaise dhīre se

hamāre sher bhī aise hī der-pā hoñge

tumhaara husn ye khulta hai jaise dhire se

hamare sher bhi aise hi der-pa honge

tumhāre jaane ke baad ham ne sukūn DhūñDā kuchh is tarah se

bichhaḌne vāloñ ke paañv paḌnā unheñ judā.ī se baaz rakhnā

tumhaare jaane ke baad hum ne sukun DhunDa kuchh is tarah se

bichhaDne walon ke panw paDna unhen judai se baz rakhna

sitāre dekhne vaale hameñ batāte haiñ

hamāre hoñT tumhārī jabīñ ko tarseñge

sitare dekhne wale hamein batate hain

hamare honT tumhaari jabin ko tarsenge

abhī se soch lo phir vāpsī nahīñ hogī

tilism baḌhtā hī jā.egā din-ba-din us kā

abhi se soch lo phir wapsi nahin hogi

tilism baDhta hi jaega din-ba-din us ka

ab us kī marzī musāfir kahe ki gard-e-pā

maiñ us ke saath musalsal safar meñ rahtā huuñ

ab us ki marzi musafir kahe ki gard-e-pa

main us ke sath musalsal safar mein rahta hun