دل بھی توڑا تو سلیقے سے نہ توڑا تم نے

بے وفائی کے بھی آداب ہوا کرتے ہیں

وطن کو پھونک رہے ہیں بہت سے اہل وطن

چراغ گھر کے ہیں سرگرم گھر جلانے میں

اس کو آواز دو محبت سے

اس کے سب نام پیارے پیارے ہیں

تم زمانے کے ہو ہمارے سوا

ہم کسی کے نہیں تمہارے ہیں

یہ سن کر میری نیندیں اڑ گئی ہیں

کوئی میرا بھی سپنا دیکھتا ہے

دل کو پھر درد سے آباد کیا ہے میں نے

مدتوں بعد تجھے یاد کیا ہے میں نے

اک سفر پھر مری تقدیر ہوا جاتا ہے

راستہ پاؤں کی زنجیر ہوا جاتا ہے

بند کمرے میں ذہن کیا بدلے

گھر سے نکلو تو کچھ فضا بدلے

ذہن ایسے بھی نہ بن جائیں نصابوں والے

گفتگو میں بھی ہوں الفاظ کتابوں والے

بنے ہیں کتنے چہرے چاند سورج

غزل کے استعاراتی افق پر

آنسوؤں کے جہاں میں رہتے ہیں

ہم اسی کہکشاں میں رہتے ہیں

ناقدو تم تو مرے فن کی پرکھ رہنے دو

اپنے سونے کو میں پیتل نہیں ہونے دوں گا

شر سے ہے خیر کا امکاں پیدا

نور و ظلمت ہوئے جڑواں پیدا

زمیں کیوں مجھ سے ٹکراتی افق پر

مرا گھر تھا مرے ذاتی افق پر