Sher of Munawwar Rana
miTTī kā badan kar diyā miTTī ke havāle
miTTī ko kahīñ tāj-mahal meñ nahīñ rakkhā
miTTi ka badan kar diya miTTi ke hawale
miTTi ko kahin taj-mahal mein nahin rakkha
dahlīz par sar khole khaḌī hogī zarūrat
ab aise meñ ghar jaanā munāsib nahīñ hogā
dahliz par sar khole khaDi hogi zarurat
ab aise mein ghar jaana munasib nahin hoga
maañ ḳhvāb meñ aa kar ye batā jaatī hai har roz
bosīda sī oḌhī huī is shaal meñ ham haiñ
man KHwab mein aa kar ye bata jati hai har roz
bosida si oDhi hui is shaal mein hum hain
vo aadmī hai to ehsās-e-jurm kaafī hai
vo sang hai to use sangsār kyā karnā
wo aadmi hai to ehsas-e-jurm kafi hai
wo sang hai to use sangsar kya karna
maiñ duniyā ke me.aar pe puurā nahīñ utrā
duniyā mire me.aar pe puurī nahīñ utrī
main duniya ke mear pe pura nahin utra
duniya mere mear pe puri nahin utri
dekhnā hai tujhe sahrā to pareshāñ kyuuñ hai
kuchh dinoñ ke liye mujh se mirī āñkheñ le jā
dekhna hai tujhe sahra to pareshan kyun hai
kuchh dinon ke liye mujh se meri aankhen le ja
bhaTaktī hai havas din-rāt sone kī dukānoñ meñ
ġharībī kaan chhidvātī hai tinkā Daal detī hai
bhaTakti hai hawas din-raat sone ki dukanon mein
gharibi kan chhidwati hai tinka Dal deti hai
adālatoñ hī se insāf surḳh-rū hai magar
adālatoñ hī meñ insāf haar jaatā hai
adalaton hi se insaf surKH-ru hai magar
adalaton hi mein insaf haar jata hai
ham sab kī jo duā thī use sun liyā gayā
phūloñ kī tarah aap ko bhī chun liyā gayā
hum sab ki jo dua thi use sun liya gaya
phulon ki tarah aap ko bhi chun liya gaya
jab bhī kashtī mirī sailāb meñ aa jaatī hai
maañ duā kartī huī ḳhvāb meñ aa jaatī hai
jab bhi kashti meri sailab mein aa jati hai
man dua karti hui KHwab mein aa jati hai
nikalne hī nahīñ detī haiñ ashkoñ ko mirī āñkheñ
ki ye bachche hamesha maañ kī nigarānī meñ rahte haiñ
nikalne hi nahin deti hain ashkon ko meri aankhen
ki ye bachche hamesha man ki nigarani mein rahte hain
bachchoñ kī fees un kī kitābeñ qalam davāt
merī ġharīb āñkhoñ meñ schōl chubh gayā
bachchon ki fees un ki kitaben qalam dawat
meri gharib aankhon mein school chubh gaya
barbād kar diyā hameñ pardes ne magar
maañ sab se kah rahī hai ki beTā maze meñ hai
barbaad kar diya hamein pardes ne magar
man sab se kah rahi hai ki beTa maze mein hai
khilaunoñ kī dukānoñ kī taraf se aap kyuuñ guzre
ye bachche kī tamannā hai ye samjhautā nahīñ kartī
khilaunon ki dukanon ki taraf se aap kyun guzre
ye bachche ki tamanna hai ye samjhauta nahin karti
mirī hathelī pe hoñToñ se aisī mohr lagā
ki umr bhar ke liye maiñ bhī surḳh-rū ho jā.ūñ
meri hatheli pe honTon se aisi mohr laga
ki umr bhar ke liye main bhi surKH-ru ho jaun
maiñ ik din be-ḳhayālī meñ kahīñ sach bol baiThā thā
maiñ koshish kar chukā huuñ muñh kī kaḌvāhaT nahīñ jaatī
main ek din be-KHayali mein kahin sach bol baiTha tha
main koshish kar chuka hun munh ki kaDwahaT nahin jati
kal apne-āp ko dekhā thā maañ kī āñkhoñ meñ
ye ā.īna hameñ būḌhā nahīñ batātā hai
kal apne-ap ko dekha tha man ki aankhon mein
ye aaina hamein buDha nahin batata hai
phir karbalā ke ba.ad dikhā.ī nahīñ diyā
aisā koī bhī shaḳhs ki pyāsā kaheñ jise
phir karbala ke baad dikhai nahin diya
aisa koi bhi shaKHs ki pyasa kahen jise
maiñ rāh-e-ishq ke har pech-o-ḳham se vāqif huuñ
ye rāsta mire ghar se nikal ke jaatā hai
main rah-e-ishq ke har pech-o-KHam se waqif hun
ye rasta mere ghar se nikal ke jata hai
tamām jism ko āñkheñ banā ke raah tako
tamām khel mohabbat meñ intizār kā hai
tamam jism ko aankhen bana ke rah tako
tamam khel mohabbat mein intizar ka hai
mujhe bhī us kī judā.ī satātī rahtī hai
use bhī ḳhvāb meñ beTā dikhā.ī detā hai
mujhe bhi us ki judai satati rahti hai
use bhi KHwab mein beTa dikhai deta hai
ġharīboñ par to mausam bhī hukūmat karte rahte haiñ
kabhī bārish kabhī garmī kabhī ThanDak kā qabza hai
gharibon par to mausam bhi hukumat karte rahte hain
kabhi barish kabhi garmi kabhi ThanDak ka qabza hai
kisī ke zaḳhm par chāhat se paTTī kaun bāñdhegā
agar bahneñ nahīñ hoñgī to rākhī kaun bāñdhegā
kisi ke zaKHm par chahat se paTTi kaun bandhega
agar bahnen nahin hongi to rakhi kaun bandhega
-
Tag : Raksha Bandhan
vahī huā ki maiñ āñkhoñ meñ us kī Duub gayā
vo kah rahā thā bhañvar kā patā nahīñ chaltā
wahi hua ki main aankhon mein us ki Dub gaya
wo kah raha tha bhanwar ka pata nahin chalta
tere dāman meñ sitāre haiñ to hoñge ai falak
mujh ko apnī maañ kī mailī oḌhnī achchhī lagī
tere daman mein sitare hain to honge ai falak
mujh ko apni man ki maili oDhni achchhi lagi
ye aisā qarz hai jo maiñ adā kar hī nahīñ saktā
maiñ jab tak ghar na lauTūñ merī maañ sajde meñ rahtī hai
ye aisa qarz hai jo main ada kar hi nahin sakta
main jab tak ghar na lauTun meri man sajde mein rahti hai
chaltī phirtī huī ā.ankhoñ se azaañ dekhī hai
maiñ ne jannat to nahīñ dekhī hai maañ dekhī hai
chalti phirti hui aaankhon se azan dekhi hai
main ne jannat to nahin dekhi hai man dekhi hai
din bhar kī mashaqqat se badan chuur hai lekin
maañ ne mujhe dekhā to thakan bhuul ga.ī hai
din bhar ki mashaqqat se badan chur hai lekin
man ne mujhe dekha to thakan bhul gai hai
ab aap kī marzī hai sambhāleñ na sambhāleñ
ḳhushbū kī tarah aap ke rūmāl meñ ham haiñ
ab aap ki marzi hai sambhaalen na sambhaalen
KHushbu ki tarah aap ke rumal mein hum hain
tujhe ma.alūm hai in phephaḌoñ meñ zaḳhm aa.e haiñ
tirī yādoñ kī ik nannhī sī chiñgārī bachāne meñ
tujhe malum hai in phephaDon mein zaKHm aae hain
teri yaadon ki ek nannhi si chingari bachane mein
hamārī dostī se dushmanī sharmā.ī rahtī hai
ham akbar haiñ hamāre dil meñ jodhā.bā.ī rahtī hai
hamari dosti se dushmani sharmai rahti hai
hum akbar hain hamare dil mein jodhabai rahti hai
is tarah mere gunāhoñ ko vo dho detī hai
maañ bahut ġhusse meñ hotī hai to ro detī hai
is tarah mere gunahon ko wo dho deti hai
man bahut ghusse mein hoti hai to ro deti hai
ham nahīñ the to kyā kamī thī yahāñ
ham na hoñge to kyā kamī hogī
hum nahin the to kya kami thi yahan
hum na honge to kya kami hogi
pachpan baras kī umr to hone ko aa ga.ī
lekin vo chehra ā.ankhoñ se ojhal na ho sakā
pachpan baras ki umr to hone ko aa gai
lekin wo chehra aaankhon se ojhal na ho saka
jitne bikhre hue kāġhaz haiñ vo yakjā kar le
raat chupke se kahā aa ke havā ne ham se
jitne bikhre hue kaghaz hain wo yakja kar le
raat chupke se kaha aa ke hawa ne hum se
ye soch ke maañ baap kī ḳhidmat meñ lagā huuñ
is peḌ kā saayā mire bachchoñ ko milegā
ye soch ke man bap ki KHidmat mein laga hun
is peD ka saya mere bachchon ko milega
maiñ isī miTTī se uTThā thā bagūle kī tarah
aur phir ik din isī miTTī meñ miTTī mil ga.ī
main isi miTTi se uTTha tha bagule ki tarah
aur phir ek din isi miTTi mein miTTi mil gai
munavvar maañ ke aage yuuñ kabhī khul kar nahīñ ronā
jahāñ buniyād ho itnī namī achchhī nahīñ hotī
munawwar man ke aage yun kabhi khul kar nahin rona
jahan buniyaad ho itni nami achchhi nahin hoti
tumhāre shahr meñ mayyat ko sab kāñdhā nahīñ dete
hamāre gaañv meñ chhappar bhī sab mil kar uThāte haiñ
tumhaare shahr mein mayyat ko sab kandha nahin dete
hamare ganw mein chhappar bhi sab mil kar uThate hain
lipaT jaatā huuñ maañ se aur mausī muskurātī hai
maiñ urdu meñ ġhazal kahtā huuñ hindī muskurātī hai
lipaT jata hun man se aur mausi muskuraati hai
main urdu mein ghazal kahta hun hindi muskuraati hai
bojh uThānā shauq kahāñ hai majbūrī kā saudā hai
rahte rahte station par log qulī ho jaate haiñ
bojh uThana shauq kahan hai majburi ka sauda hai
rahte rahte station par log quli ho jate hain
ab judā.ī ke safar ko mire āsān karo
tum mujhe ḳhvāb meñ aa kar na pareshān karo
ab judai ke safar ko mere aasan karo
tum mujhe KHwab mein aa kar na pareshan karo
kuchh bikhrī huī yādoñ ke qisse bhī bahut the
kuchh us ne bhī bāloñ ko khulā chhoḌ diyā thā
kuchh bikhri hui yaadon ke qisse bhi bahut the
kuchh us ne bhi baalon ko khula chhoD diya tha
shahr ke raste hoñ chāhe gaañv kī pagDañDiyāñ
maañ kī uñglī thaam kar chalnā bahut achchhā lagā
shahr ke raste hon chahe ganw ki pagDanDiyan
man ki ungli tham kar chalna bahut achchha laga
shāyad jalī haiñ phir kahīñ nazdīk bastiyāñ
guzre haiñ kuchh parinde idhar se Dare hue
shayad jali hain phir kahin nazdik bastiyan
guzre hain kuchh parinde idhar se Dare hue
daulat se mohabbat to nahīñ thī mujhe lekin
bachchoñ ne khilaunoñ kī taraf dekh liyā thā
daulat se mohabbat to nahin thi mujhe lekin
bachchon ne khilaunon ki taraf dekh liya tha
bhaTaktī hai havas din-rāt sone kī dukānoñ par
ġharībī kaan chhidvātī hai tinkā Daal letī hai
bhaTakti hai hawas din-raat sone ki dukanon par
gharibi kan chhidwati hai tinka Dal leti hai
tumhārī āñkhoñ kī tauhīn hai zarā socho
tumhārā chāhne vaalā sharāb piitā hai
tumhaari aankhon ki tauhin hai zara socho
tumhaara chahne wala sharab pita hai
tum ne jab shahr ko jañgal meñ badal Daalā hai
phir to ab qais ko jañgal se nikal aane do
tum ne jab shahr ko jangal mein badal Dala hai
phir to ab qais ko jangal se nikal aane do
vus.at-e-sahrā bhī muñh apnā chhupā kar niklī
saarī duniyā mire kamre ke barābar niklī
wusat-e-sahra bhi munh apna chhupa kar nikli
sari duniya mere kamre ke barabar nikli