ghar meñ ḳhud ko qaid to maiñ ne aaj kiyā hai

tab bhī tanhā thā jab mahfil mahfil thā maiñ

ghar mein KHud ko qaid to main ne aaj kiya hai

tab bhi tanha tha jab mahfil mahfil tha main

raat thī jab tumhārā shahr aayā

phir bhī khiḌkī to maiñ ne khol hī lī

raat thi jab tumhaara shahr aaya

phir bhi khiDki to main ne khol hi li

vo baat soch ke maiñ jis ko muddatoñ jiitā

bichhaḌte vaqt batāne kī kyā zarūrat thī

wo baat soch ke main jis ko muddaton jita

bichhaDte waqt batane ki kya zarurat thi

ab mujhe kaun jiit saktā hai

tū mire dil kā āḳhirī Dar thā

ab mujhe kaun jit sakta hai

tu mere dil ka aaKHiri Dar tha

haiñ ab is fikr meñ Duube hue ham

use kaise lage rote hue ham

hain ab is fikr mein Dube hue hum

use kaise lage rote hue hum

kaun kahe ma.asūm hamārā bachpan thā

khel meñ bhī to aadhā aadhā āñgan thā

kaun kahe masum hamara bachpan tha

khel mein bhi to aadha aadha aangan tha

sab āsān huā jaatā hai

mushkil vaqt to ab aayā hai

sab aasan hua jata hai

mushkil waqt to ab aaya hai

kahāñ sochā thā maiñ ne bazm-ārā.ī se pahle

ye merī āḳhirī mahfil hai tanhā.ī se pahle

kahan socha tha main ne bazm-arai se pahle

ye meri aaKHiri mahfil hai tanhai se pahle

jhuuT par us ke bharosā kar liyā

dhuup itnī thī ki saayā kar liyā

jhuT par us ke bharosa kar liya

dhup itni thi ki saya kar liya

nayā yuuñ hai ki an-dekhā hai sab kuchh

yahāñ tak raushnī aatī kahāñ thī

naya yun hai ki an-dekha hai sab kuchh

yahan tak raushni aati kahan thi

fāsla rakh ke bhī kyā hāsil huā

aaj bhī us kā hī kahlātā huuñ maiñ

fasla rakh ke bhi kya hasil hua

aaj bhi us ka hi kahlata hun main

maut ne saarī raat hamārī nabz TaTolī

aisā marne kā māhaul banāyā ham ne

maut ne sari raat hamari nabz TaToli

aisa marne ka mahaul banaya hum ne

aao gale mil kar ye dekheñ

ab ham meñ kitnī duurī hai

aao gale mil kar ye dekhen

ab hum mein kitni duri hai

kaise TukḌoñ meñ use kar luuñ qubūl

jo mirā saare kā saarā thā kabhī

kaise TukDon mein use kar lun qubul

jo mera sare ka sara tha kabhi

duniyā shāyad bhuul rahī hai

chāhat kuchh ūñchā suntī hai

duniya shayad bhul rahi hai

chahat kuchh uncha sunti hai

saarī duniyā se laḌe jis ke liye

ek din us se bhī jhagḌā kar liyā

sari duniya se laDe jis ke liye

ek din us se bhi jhagDa kar liya

kaun thā vo jis ne ye haal kiyā hai merā

kis ko itnī āsānī se hāsil thā maiñ

kaun tha wo jis ne ye haal kiya hai mera

kis ko itni aasani se hasil tha main

jin par maiñ thoḌā sā bhī āsān huā huuñ

vahī batā sakte haiñ kitnā mushkil thā maiñ

jin par main thoDa sa bhi aasan hua hun

wahi bata sakte hain kitna mushkil tha main

vahāñ iid kyā vahāñ diid kyā

jahāñ chāñd raat na aa.ī ho

wahan id kya wahan did kya

jahan chand raat na aai ho

achānak haḌbaḌā kar niiñd se maiñ jaag uTThā huuñ

purānā vāqi.a hai jis pe hairat ab huī hai

achanak haDbaDa kar nind se main jag uTTha hun

purana waqia hai jis pe hairat ab hui hai

ḳhvāb vaise to ik ināyat hai

aañkh khul jaa.e to musībat hai

KHwab waise to ek inayat hai

aankh khul jae to musibat hai

abhī to achchhī lagegī kuchh din judā.ī kī rut

abhī hamāre liye ye sab kuchh nayā nayā hai

abhi to achchhi lagegi kuchh din judai ki rut

abhi hamare liye ye sab kuchh naya naya hai

bahut bhaTke to ham samjhe haiñ ye baat

burā aisā nahīñ apnā makāñ bhī

bahut bhaTke to hum samjhe hain ye baat

bura aisa nahin apna makan bhi

maiñ kisī dūsre pahlū se use kyuuñ sochūñ

yuuñ bhī achchhā hai vo jaisā nazar aatā hai mujhe

main kisi dusre pahlu se use kyun sochun

yun bhi achchha hai wo jaisa nazar aata hai mujhe

patā nahīñ ye tamannā-e-qurb kab jaagī

mujhe to sirf use sochne kī aadat thī

pata nahin ye tamanna-e-qurb kab jagi

mujhe to sirf use sochne ki aadat thi

pahlī baar vo ḳhat likkhā thā

jis kā javāb bhī aa saktā thā

pahli bar wo KHat likkha tha

jis ka jawab bhi aa sakta tha

bahut hasīñ raat hai magar tum to so rahe ho

nikal ke kamre se ik nazar chāñdnī to dekho

bahut hasin raat hai magar tum to so rahe ho

nikal ke kamre se ek nazar chandni to dekho

kam se kam duniyā se itnā mirā rishta ho jaa.e

koī merā bhī burā chāhne vaalā ho jaa.e

kam se kam duniya se itna mera rishta ho jae

koi mera bhi bura chahne wala ho jae

larazte kāñpte hāthoñ se būḌhā

chilam meñ phir koī dukh bhar rahā thā

larazte kanpte hathon se buDha

chilam mein phir koi dukh bhar raha tha

bahut himmat kā hai ye kaam 'shāriq'

ki sharmāte nahīñ Darte hue ham

bahut himmat ka hai ye kaam 'shaariq'

ki sharmate nahin Darte hue hum

bhiiḌ meñ jab tak rahte haiñ joshīle haiñ

alag alag ham log bahut sharmīle haiñ

bhiD mein jab tak rahte hain joshile hain

alag alag hum log bahut sharmile hain

kis tarah aa.e haiñ is pahlī mulāqāt talak

aur mukammal hai judā hone kī tayyārī bhī

kis tarah aae hain is pahli mulaqat talak

aur mukammal hai juda hone ki tayyari bhi

rukā mahfil meñ itnī der tak maiñ

ujāloñ kā buḌhāpā dekh aayā

ruka mahfil mein itni der tak main

ujalon ka buDhapa dekh aaya

ek din ham achānak baḌe ho ga.e

khel meñ dauḌ kar us ko chhūte hue

ek din hum achanak baDe ho gae

khel mein dauD kar us ko chhute hue

yahī kamra thā jis meñ chain se ham jī rahe the

ye tanhā.ī to itnī be-muravvat ab huī hai

yahi kamra tha jis mein chain se hum ji rahe the

ye tanhai to itni be-murawwat ab hui hai

bahut gadlā thā paanī us nadī kā

magar maiñ apnā chehra dekh aayā

bahut gadla tha pani us nadi ka

magar main apna chehra dekh aaya

bīnā.ī bhī kyā kyā dhoke detī hai

duur se dekho saare dariyā niile haiñ

binai bhi kya kya dhoke deti hai

dur se dekho sare dariya nile hain

vo bastī nā-ḳhudāoñ kī thī lekin

mile kuchh Dūbne vaale vahāñ bhī

wo basti na-KHudaon ki thi lekin

mile kuchh Dubne wale wahan bhi

guftugū kar ke pareshāñ huuñ ki lahje meñ tire

vo khulā-pan hai ki dīvār huā jaatā hai

guftugu kar ke pareshan hun ki lahje mein tere

wo khula-pan hai ki diwar hua jata hai

ḳhamoshī bas ḳhamoshī thī ijāzat ab huī hai

ishāroñ ko tire paḌhne kī jur.at ab huī hai

KHamoshi bas KHamoshi thi ijazat ab hui hai

ishaaron ko tere paDhne ki jurat ab hui hai

tasallī ab huī kuchh dil ko mere

tirī galiyoñ ko suunā dekh aayā

tasalli ab hui kuchh dil ko mere

teri galiyon ko suna dekh aaya

ho sabab kuchh bhī mire aañkh bachāne kā magar

saaf kar duuñ ki nazar kam nahīñ aatā hai mujhe

ho sabab kuchh bhi mere aankh bachane ka magar

saf kar dun ki nazar kam nahin aata hai mujhe

ye sach hai duniyā bahut hasīñ hai

magar mirī umr kī nahīñ hai

ye sach hai duniya bahut hasin hai

magar meri umr ki nahin hai

faisle auroñ ke kartā huuñ

apnī sazā kaTtī rahtī hai

faisle auron ke karta hun

apni saza kaTti rahti hai

ajab lahje meñ karte the dar o dīvār bāteñ

mire ghar ko bhī shāyad merī aadat ab huī hai

ajab lahje mein karte the dar o diwar baaten

mere ghar ko bhi shayad meri aadat ab hui hai

pata thā mujh ko mulāqāt ġhair-mumkin hai

so terā dhyān kiyā aur gulāb chuum liyā

pata tha mujh ko mulaqat ghair-mumkin hai

so tera dhyan kiya aur gulab chum liya

umr bhar kis ne bhalā ġhaur se dekhā thā mujhe

vaqt kam ho to sajā detī hai bīmārī bhī

umr bhar kis ne bhala ghaur se dekha tha mujhe

waqt kam ho to saja deti hai bimari bhi

ek muddat huī ghar se nikle hue

apne māhaul meñ ḳhud ko dekhe hue

ek muddat hui ghar se nikle hue

apne mahaul mein KHud ko dekhe hue

qurb kā us ke uThā kar fā.eda

hijr kā sāmāñ ikaTThā kar liyā

qurb ka us ke uTha kar faeda

hijr ka saman ikaTTha kar liya

kabhī ḳhud ko chhū kar nahīñ dekhtā huuñ

ḳhudā jaane kis vahm meñ mubtalā huuñ

kabhi KHud ko chhu kar nahin dekhta hun

KHuda jaane kis wahm mein mubtala hun