jo tirī justujū meñ chhoḌ diyā

us kā nemul-badal to tū bhī nahīñ

jo teri justuju mein chhoD diya

us ka nemul-badal to tu bhi nahin

tere hote bhī sab ḳharāb hī thā

aur phir aaj kal to tū bhī nahīñ

tere hote bhi sab KHarab hi tha

aur phir aaj kal to tu bhi nahin

us kā bichhaḌnā le gayā hiss-e-mizāh tak

hañsne kī baat kartā huuñ hañstā koī nahīñ

us ka bichhaDna le gaya hiss-e-mizah tak

hansne ki baat karta hun hansta koi nahin

ham log terī ḳhushiyoñ meñ shāmil to hoñge dost

zāhir hai ġham bhī biich meñ haa.el to hoñge dost

hum log teri KHushiyon mein shamil to honge dost

zahir hai gham bhi bich mein hael to honge dost

jis qadar rone kī 'ādat hai vo din duur nahīñ

log bulvā.eñge marne pe mujhe rone ko

jis qadar rone ki 'adat hai wo din dur nahin

log bulwaenge marne pe mujhe rone ko

ham to jaise ki kināre pe khaḌe hote haiñ

vo udāsī hai ki bas baat mile rone ko

hum to jaise ki kinare pe khaDe hote hain

wo udasi hai ki bas baat mile rone ko

tumhārā milnā to pahle bhī kitnā mushkil thā

aur ab kī baar to hālāt bhī ḳharāb hue

tumhaara milna to pahle bhi kitna mushkil tha

aur ab ki bar to haalat bhi KHarab hue

tire na aane kā sun kar bahut udaas huā

vo aadmī jo tire intizār meñ bhī na thā

tere na aane ka sun kar bahut udas hua

wo aadmi jo tere intizar mein bhi na tha

sitāre toḌ ke laayā thā us ko dene ko

use diye bhī nahīñ haath bhī ḳharāb hue

sitare toD ke laya tha us ko dene ko

use diye bhi nahin hath bhi KHarab hue

tumhāre saath to sūraj ubhartā dekhte the

tumhāre baa'd sabhī dost jaldī sone lage

tumhaare sath to suraj ubharta dekhte the

tumhaare ba'd sabhi dost jaldi sone lage

jo ro rahe hoñ un kī ḳhushī meñ sharīk hoñ

jo hañs rahe hoñ un ko dilāsā diyā kareñ

jo ro rahe hon un ki KHushi mein sharik hon

jo hans rahe hon un ko dilasa diya karen

mā'sūm thā maiñ phir bhī sazā kar diyā us ne

achchhe bhale qaidī ko rihā kar diyā us ne

ma'sum tha main phir bhi saza kar diya us ne

achchhe bhale qaidi ko riha kar diya us ne

ye dukh nahīñ ki shahr meñ merā koī nahīñ

ye dukh kī baat hai ki kisī kā koī nahīñ

ye dukh nahin ki shahr mein mera koi nahin

ye dukh ki baat hai ki kisi ka koi nahin

āvāz jis kī pyārī hai milne chaleñ use

suntā nahīñ kisī kī magar boltā to hai

aawaz jis ki pyari hai milne chalen use

sunta nahin kisi ki magar bolta to hai

phuul is vāste khiltā hai ki tū dekhe use

mausam is vāste achchhā hai ki tū sair kare

phul is waste khilta hai ki tu dekhe use

mausam is waste achchha hai ki tu sair kare

hamāre ashk tire paañv tak bhigone lage

baloch hote hue bhī kisī ko rone lage

hamare ashk tere panw tak bhigone lage

baloch hote hue bhi kisi ko rone lage

vo mujh meñ bhar gayā hai mohabbat ke naam par

ik rang jis kā āb-o-havā kuchh na kar sake

wo mujh mein bhar gaya hai mohabbat ke nam par

ek rang jis ka aab-o-hawa kuchh na kar sake

vo qāfile meñ to kyā thā ġhubār meñ bhī na thā

jo avval aayā hai pahle hazār meñ bhī na thā

wo qafile mein to kya tha ghubar mein bhi na tha

jo awwal aaya hai pahle hazar mein bhi na tha

kyuuñ aaj tujhe dekh ke mahsūs huā hai

dekhā hai kisī aur ne ā.īna hamārā

kyun aaj tujhe dekh ke mahsus hua hai

dekha hai kisi aur ne aaina hamara

ab dil meñ havas naam kī gandum nahīñ ugtī

ye khet 'ajab sīm-zada kar diyā us ne

ab dil mein hawas nam ki gandum nahin ugti

ye khet 'ajab sim-zada kar diya us ne