صدیوں کا انتشار فصیلوں میں قید تھا

دستک یہ کس نے دی کہ عمارت بکھر گئی

اک رات ہے پھیلی ہوئی صدیوں پر

ہر لمحہ اندھیروں کے اثر میں ہے

میں لفظ خام ہوں کوئی کہ ترجمان غزل

یہ فیصلہ کسی تازہ کتاب پر ٹھہرا

گاؤں سے گزرے گا اور مٹی کے گھر لے جائے گا

ایک دن دریا سبھی دیوار و در لے جائے گا

کچی دیواریں صدا نوشی میں کتنی طاق تھیں

پتھروں میں چیخ کر دیکھا تو اندازا ہوا

کشتیاں ڈوب رہی ہیں کوئی ساحل لاؤ

اپنی آنکھیں مری آنکھوں کے مقابل لاؤ

ہر روح پس پردۂ ترتیب عناصر

ناکردہ گناہوں کی سزا کاٹ رہی ہے

لوٹ بھی آیا تو صدیوں کی تھکن لائے گا

صبح کا بھولا ہوا شام کو گھر آنے تک

جو سنتے ہیں کہ ترے شہر میں دسہرا ہے

ہم اپنے گھر میں دوالی سجانے لگتے ہیں

ہوا کی گود میں موج سراب بھی ہوگی

گریں گے پھول تو ٹھہرے گی گرد شاخوں پر

عجیب آگ لگا کر کوئی روانہ ہوا

مرے مکان کو جلتے ہوئے زمانہ ہوا

سمند خواب وہاں چھوڑ کر روانہ ہوا

جہاں سراغ سفر کوئی نقش پا نہ ہوا

اماں کسے تھی مرے سائے میں جو رکتا کوئی

خود اپنی آگ میں جلتا ہوا شجر تھا میں

کون ہے تجھ سا جو بانٹے مری دن بھر کی تھکن

مضمحل رات ہے بستر کا بدن دکھتا ہے