zindagī kī bhī yaqīnan koī manzil hogī

ye safar hī kī tarah ek safar hai ki nahīñ

zindagi ki bhi yaqinan koi manzil hogi

ye safar hi ki tarah ek safar hai ki nahin

aise kho.e sahar ke dīvāne

lauT kar shaam tak na ghar aa.e

aise khoe sahar ke diwane

lauT kar sham tak na ghar aae

ġham-e-insāñ ko siine se lagā lo

ye ḳhidmat bandagī se kam nahīñ hai

gham-e-insan ko sine se laga lo

ye KHidmat bandagi se kam nahin hai

aap se yaad aap kī achchhī

aap to ham ko bhuul jaate haiñ

aap se yaad aap ki achchhi

aap to hum ko bhul jate hain

tūfāñ se bach ke Duubī hai kashtī kahāñ na pūchh

sāhil bhī e'tibār ke qābil nahīñ rahā

tufan se bach ke Dubi hai kashti kahan na puchh

sahil bhi e'tibar ke qabil nahin raha

yahī aa.ina hai vo ā.īna jo liye hai jalva-e-āgahī

ye jo shā.erī kā shu.ūr hai ye payambarī kī talāsh hai

yahi aaina hai wo aaina jo liye hai jalwa-e-agahi

ye jo shaeri ka shuur hai ye payambari ki talash hai

anāsir kī koī tartīb qaa.em rah nahīñ saktī

taġhayyur ġhair-fānī hai taġhayyur jāvedānī hai

anasir ki koi tartib qaem rah nahin sakti

taghayyur ghair-fani hai taghayyur jawedani hai

husn kī be-ruḳhī ko ahl-e-nazar

hāsil-e-iltifāt kahte haiñ

husn ki be-ruKHi ko ahl-e-nazar

hasil-e-iltifat kahte hain

agar duniyā tujhe dīvāna kahtī hai to kahne de

vafādārān-e-ulfat par yahī ilzām aatā hai

agar duniya tujhe diwana kahti hai to kahne de

wafadaran-e-ulfat par yahi ilzam aata hai

ḳhudā mahfūz rakkhe intishār-e-rahnumā.ī se

isī manzil pe aa ke aadmī dīvāna hotā hai

KHuda mahfuz rakkhe intishaar-e-rahnumai se

isi manzil pe aa ke aadmi diwana hota hai

bachchoñ kā sā mizāj hai taḳhlīq-kār kā

apne sivā kisī ko baḌā māntā nahīñ

bachchon ka sa mizaj hai taKHliq-kar ka

apne siwa kisi ko baDa manta nahin

aa.e the be-niyāz tirī bārgāh meñ

jaate haiñ ik hujūm-e-tamannā liye hue

aae the be-niyaz teri bargah mein

jate hain ek hujum-e-tamanna liye hue

aadmī aur dard se nā-āshnā mumkin nahīñ

aks se ḳhālī ho koī ā.īna mumkin nahīñ

aadmi aur dard se na-ashna mumkin nahin

aks se KHali ho koi aaina mumkin nahin

rumūz-e-ishq-o-mohabbat se āshnā huuñ maiñ

kisī ko ġham-zada dekhā to ro diyā huuñ maiñ

rumuz-e-ishq-o-mohabbat se aashna hun main

kisi ko gham-zada dekha to ro diya hun main

ye zindagī jise apnā samajh rahe haiñ sab

hai musta.ār faqat raunaq-e-jahāñ ke liye

ye zindagi jise apna samajh rahe hain sab

hai mustaar faqat raunaq-e-jahan ke liye

ġham kī tashrīh hañsī-khel nahīñ hai koī

pahle insān tū bin phir ye hunar paidā kar

gham ki tashrih hansi-khel nahin hai koi

pahle insan tu bin phir ye hunar paida kar

gulshan ke parastāro tum ko to patā hogā

vo kaun haiñ āḳhir jo kaliyoñ ko masalte haiñ

gulshan ke parastaro tum ko to pata hoga

wo kaun hain aaKHir jo kaliyon ko masalte hain

tirī samajh meñ na aa sakegī kisī ke ashkoñ kī qadr-o-qīmat

abhī hai nā-āshnā-e-ġham tū abhī tirā dil dukhā nahīñ hai

teri samajh mein na aa sakegi kisi ke ashkon ki qadr-o-qimat

abhi hai na-ashna-e-gham tu abhi tera dil dukha nahin hai

ho na jab tak 'matīn' kaif-e-ġham

aadmī ko ḳhudā nahīñ miltā

ho na jab tak 'matin' kaif-e-gham

aadmi ko KHuda nahin milta

'matīn' un kā karam vāqa.ī karam hai to phir

ye be-ruḳhī ye taġhāful ye barhamī kyā hai

'matin' un ka karam waqai karam hai to phir

ye be-ruKHi ye taghaful ye barhami kya hai

ġham-e-ma.āl ġham-e-zindagī ġham-e-daurāñ

hamāre ishq kā charchā kahāñ kahāñ na rahā

gham-e-maal gham-e-zindagi gham-e-dauran

hamare ishq ka charcha kahan kahan na raha

ham to āshufta-sarī se na sañvarne paa.e

aap se kyuuñ na sañvārā gayā gesū apnā

hum to aashufta-sari se na sanwarne pae

aap se kyun na sanwara gaya gesu apna

ātish-e-gul koī chiñgārī nahīñ sho.ala nahīñ

phuul khilte haiñ to gulshan mirā jaltā kyuuñ hai

aatish-e-gul koi chingari nahin shoala nahin

phul khilte hain to gulshan mera jalta kyun hai

kabhī kabhī to mohabbat kī zindagī ke liye

ḳhud un ko ham ne ubhārā hai barhamī ke liye

kabhi kabhi to mohabbat ki zindagi ke liye

KHud un ko hum ne ubhaara hai barhami ke liye

gumrahī rahh-numā.ī ke muqābil aa.ī

vaqt ne dekhiye dīvār pe likkhā kyā hai

gumrahi rahh-numai ke muqabil aai

waqt ne dekhiye diwar pe likkha kya hai

fazā meñ guuñj rahī haiñ kahāniyāñ ġham kī

hamīñ ko hausla-e-sharh-e-dāstāñ na rahā

faza mein gunj rahi hain kahaniyan gham ki

hamin ko hausla-e-sharh-e-dastan na raha

ham kā.enāt-e-sidq ko sāñche meñ Dhaal kar

doshīza-e-zabāñ kī virāsat meñ laa.e haiñ

hum kaenat-e-sidq ko sanche mein Dhaal kar

doshiza-e-zaban ki wirasat mein lae hain