جب بھی والد کی جفا یاد آئی

اپنے دادا کی خطا یاد آئی

دشمنوں کی دشمنی میرے لیے آسان تھی

خرچ آیا دوستوں کی میزبانی میں بہت

اپنے دم سے ہے زمانے میں گھٹالوں کا وجود

ہم جہاں ہوں گے گھٹالے ہی گھٹالے ہوں گے

دوسری نے جو سنبھالی چپل

پہلی بیوی کی وفا یاد آئی

جب ہوا کالے کا گورے سے ملاپ

مل گئیں تاریکیاں تنویر سے

یہاں جتنے ہیں اپنے باپ کے ہیں

تمہارے باپ کا کوئی نہیں ہے

جل گیا کون میرے ہنسنے پر

''یہ دھواں سا کہاں سے اٹھتا ہے''

عشق اولاد کر رہی ہے مگر

میرا جینا حرام ہوتا ہے

کہا اٹھلا کے اس نے آئیے نا

یہاں میرے سوا کوئی نہیں ہے

زلف کے پیچ میں لٹکے ہوئے شاعر کا وجود

تھک چکا ہوگا اسے مل کے اتارو یارو

جھوٹ ہے دل نہ جاں سے اٹھتا ہے

یہ دھواں درمیاں سے اٹھتا ہے

ہم کہ ہیں بے گھر کوئی وارنٹ لائے گا کہاں

جرم کی آسانیاں ہیں لا مکانی میں بہت

جو حسن جوانوں کے لیے وقف ہے اس کو

اک بار تو بوڑھوں کو دکھانے کے لیے آ

دن میں کبھی ہاتھوں کی صفائی سے گرہ کاٹ

شب میں کبھی سامان چرانے کے لیے آ

درد تو اپنی کمائی کا ہوا کرتا ہے

باپ کا مال ہے کھا کھا کے ڈکارو یارو

مار لاتا ہے جوتیاں دو چار

''جو ترے آستاں سے اٹھتا ہے''

پہلے ہوتا تھا نظر کے تیر سے

کام اب ہوتا ہے وہ کف گیر سے

بھوک کا کچھ اسے بھی ہو احساس

وہ ستم گر ادیب ہو جائے

دبانا شرط ہے بجتے ہیں سارے

کھلونا بے صدا کوئی نہیں ہے

دل کے بجائے کیسے وہ پہلو میں آ گیا

اے شیخ جی پڑھا یہ سبق کس کتاب میں