نام میرا سنتے ہی شرما گئے

تم نے تو خود آپ کو رسوا کیا

آنکھوں میں ہے لحاظ تبسم فزا ہیں لب

شکر خدا کے آج تو کچھ راہ پر ہیں آپ

کفر و دیں کے قاعدے دونوں ادا ہو جائیں گے

ذبح وہ کافر کرے منہ سے کہیں تکبیر ہم

سیلاب چشم تر سے زمانہ خراب ہے

شکوے کہاں کہاں ہیں مرے آب دیدہ کے

ربط باہم کے مزے باہم رہیں تو خوب ہیں

یاد رکھنا جان جاں گر میں نہیں تو تو نہیں

کعبہ نہیں ہے زاہد غافل نشان دوست

دل ڈھونڈ عاشقوں کا یہی ہے مکان دوست

کیا اس حرام خور کو جز مردہ ہے نصیب

آیا نہ منہ میں گور کے لقمہ حلال کا

ترا جمال بنا میں کبھی، کبھی احساں

غرض یہ تھی کہ مجھے برگزیدہ ہونا تھا

کبھی آغوش میں رہتا کبھی رخساروں پر

کاش اے آفت جاں میں ترا آنسو ہوتا

مطلب ہے مرا عارض پر نور کا جلوہ

عاشق ہوں ترا نام کو بندہ ہوں خدا کا

نسیمؔ دہلوی ہم موجد باب فصاحت ہیں

کوئی اردو کو کیا سمجھے گا جیسا ہم سمجھتے ہیں

اے ساکنان چرخ معلی بچو بچو

طوفاں ہوا بلند مرے آب دیدہ کا

مضمون کے بھی شعر اگر ہوں تو خوب ہیں

کچھ ہو نہیں گئی غزل عاشقانہ فرض

حرفوں کے ملے جوڑ بڑھا حسن رقم کا

ہر لفظ کے پیوند میں بخیہ ہے قلم کا

گنگ ہیں جن کو خموشی کا مزا ہوتا ہے

دہن زخم میں خود قفل حیا ہوتا ہے

مطلب کی بات کہہ نہ سکے ان سے رات بھر

معنی بھی منہ چھپائے ہوئے گفتگو میں تھا

کثرت‌ دولت میں لطف خانہ بربادی بھی ہے

شہد کے ہونے سے لٹ جاتا ہے گھر زنبور کا

کار دیں یا فکر دنیا کیجیے

زندگی تھوڑی ہے کیا کیا کیجیے

نکلتے ہیں برابر اشک میری دونوں آنکھوں سے

متاع درد تلنے کی ترازو ہو تو ایسی ہو

تصدق ہونے والے پس نہ جائیں

اٹھائے ہاتھ سے دامن کو چلئے

ابرو میں خم جبین میں چیں زلف میں شکن

آیا جو میرا نام تو کس کس میں بل پڑے

اللہ رے تردد خاطر کی کثرتیں

تودہ بنا دیا مجھے گرد ملال کا

روز ہو جاتی ہیں ہم سے ایک دو اٹھکھیلیاں

نوجوانی آج تک باقی ہے چرخ پیر کی

شوق شراب خواہش جام و سبو نہیں

ہے سب حرام جب سے کہ پہلو میں تو نہیں

بھولتی ہیں کب نگاہیں چشم جادو خیز کی

ہم کو سامان فراموشی سب اپنا یاد ہے

ایک سے دو داغ دو سے چار پھر تو سیکڑوں

کھلتے کھلتے پھول سینے پر گلستاں ہو گیا

تمہارے حسن نے ہر داؤں میں اسے جیتا

ہزار طرح سے گھٹ بڑھ کے بازی ہارا چاند

میزان عدالت ہیں مرے دیدۂ پر آب

ہم وزن ہر آنسو کا ہر آنسو نظر آیا

حسن برہنگی کے اٹھاتے بڑے مزے

ہوتا نہ روح کو جو لباس بدن حجاب

اے چرخ پیر زور جوانی سے در گزر

اب پاس چاہیے تجھے پشت خمیدہ کا

حب دنیا الفت زر دل سے دم بھر کم نہیں

اس پر اے زاہد ارادہ ہے خدا کی یاد کا

سیکڑوں من سے بھی زنجیر مری بھاری ہے

واہ کیا شوکت سامان گنہ گاری ہے

کچھ عجب تاثیر تھی اس بت کے نظارے میں بھی

جو مسلماں اس طرف گزرا برہمن ہو گیا

خواہش وصل سے خط پڑھنے کے قابل نہ رہا

لپٹے الفاظ سے الفاظ مکرر ہو کر

پڑ گئی چھینٹ تو اتنا نہ خفا ہو واعظ

مے رہے گی تری آغوش میں دختر ہو کر

مزہ مطلع کا دے فکر دو پہلو ہو تو ایسی ہو

رہیں حصے برابر بیت ابرو ہو تو ایسی ہو

آواز کی طرح سے بیٹھیں گے آج اے جاں

دیکھیں تو آپ کیوں کر ہم کو اٹھا ہی دیں گے

رات دن بازوئے مژگاں پہ بندھا رہتا ہے

ہے مرا اشک مرے دیدۂ تر کا تعویذ

نہ یوں نیچی کیے گردن کو چلئے

ذرا اونچی کیے چتون کو چلئے

اب وہ گلی جائے خطر ہو گئی

حال سے لوگوں کو خبر ہو گئی

وہ جس رستے سے نکلے دیکھ لینا

کہ اس رستے میں پھر رستا نہ ہوگا

اے دل پھر ان سے دوستی کی

او خانہ خراب پھر وہی کی

ایسے مسافران عدم تنگ دل گئے

منہ بھی کیا نہ عالم ایجاد کی طرف

جب فصل گل آتی ہے صدا دیتی ہے وحشت

زنجیر کا غل نعرۂ مستانہ ہے اس کا

خوب ہی پھر تو سمجھتا میں دل دشمن سے

ایک ساعت مرے پہلو میں اگر تو ہوتا

کہتے ہیں جسے حسن وہ ہے شمع جہاں تاب

کہتے ہیں جسے عشق وہ پروانہ ہے اس کا

ساکن مسجد کبھی گہ معتکف ہے دیر کا

ملت و دین نسیمؔ دہلوی رندانہ ہے

میں ہوں اک اور ہی لیلیٰ کا مائل

تسلی کیا مری محمل سے ہوگی

ادب بادہ پرستی نہ گیا مستی میں

صورت کعبہ طواف در مے خانہ ہے

ٹھنڈی کبھی نہ ہوں گی کیا گرمیاں تمہاری

آخر نسیمؔ کا دل کب تک جلائیے گا