dil bhī ik zid pe aḌā hai kisī bachche kī tarah

yā to sab kuchh hī ise chāhiye yā kuchh bhī nahīñ

dil bhi ek zid pe aDa hai kisi bachche ki tarah

ya to sab kuchh hi ise chahiye ya kuchh bhi nahin

shaam ko jis vaqt ḳhālī haath ghar jaatā huuñ maiñ

muskurā dete haiñ bachche aur mar jaatā huuñ maiñ

sham ko jis waqt KHali hath ghar jata hun main

muskura dete hain bachche aur mar jata hun main

mire dil ke kisī kone meñ ik ma.asūm sā bachcha

baḌoñ kī dekh kar duniyā baḌā hone se Dartā hai

mere dil ke kisi kone mein ek masum sa bachcha

baDon ki dekh kar duniya baDa hone se Darta hai

kisī din zindagānī meñ karishma kyuuñ nahīñ hotā

maiñ har din jaag to jaatā huuñ zinda kyuuñ nahīñ hotā

kisi din zindagani mein karishma kyun nahin hota

main har din jag to jata hun zinda kyun nahin hota

yahāñ har shaḳhs har pal hādsa hone se Dartā hai

khilaunā hai jo miTTī kā fanā hone se Dartā hai

yahan har shaKHs har pal hadsa hone se Darta hai

khilauna hai jo miTTi ka fana hone se Darta hai