خیال زلف دوتا میں نصیرؔ پیٹا کر

گیا ہے سانپ نکل تو لکیر پیٹا کر

گلے میں تو نے وہاں موتیوں کا پہنا ہار

یہاں پہ اشک مسلسل گلے کا ہار رہا

ہم ہیں اور مجنوں ازل سے خانہ پرورد جنوں

اس نے کی صحرا نوردی ہم نے گلیاں دیکھیاں

غزل اس بحر میں کیا تم نے لکھی ہے یہ نصیرؔ

جس سے ہے رنگ گل معنیٔ مشکل ٹپکا

یہ داغ نہیں تن پر میں دیکھنے کو تیرے

اے رنگ گل خوبی آنکھیں ہوں لگا لایا

ہم دکھائیں گے تماشہ تجھ کو پھر سرو چمن

دل سے گر سرزد ہمارے نالۂ موزوں ہوا

آمد و شد کوچے میں ہم اس کے کیوں نہ کریں مانند نفس

زندگی اپنی جانتے ہیں اس واسطے آتے جاتے ہیں

گردش چرخ نہیں کم بھی ہنڈولے سے کہ مہر

شام کو ماہ سے اونچا ہے سحر ہے نیچا

نہیں ہے فرصت اک دم پہ آہ اس کو نظر

حباب دیکھے ہے آنکھیں نکال کے کیسا

یہ ابر ہے یا فیل سیہ مست ہے ساقی

بجلی کے جو ہے پاؤں میں زنجیر ہوا پر

چمن میں غنچہ منہ کھولے ہے جب کچھ دل کی کہنے کو

نسیم صبح بھر رکھتی ہے باتوں میں لگا لپٹا

پستاں کو تیرے دیکھ کے مٹ جائے پھر حباب

دریا میں تا بہ سینہ اگر تو نہائے صبح

بجائے آب مے نرگسی پلا مجھ کو

غذا کچھ اور نہ بادام کے سوا ٹھہرا

مے کشی کا ہے یہ شوق اس کو کہ آئینے میں

کان کے جھمکے کو انگور کا خوشا سمجھا

جب کہ لے زلف تری مصحف رخ کا بوسہ

پھر یہاں فرق ہو ہندو و مسلمان میں کیا

جوں موج ہاتھ ماریے کیا بحر عشق میں

ساحل نصیرؔ دور ہے اور دم نہیں رہا

وقت نماز ہے ان کا قامت گاہ خدنگ و گاہ کماں

بن جاتے ہیں اہل عبادت گاہ خدنگ و گاہ کماں

برقعہ کو الٹ مجھ سے جو کرتا ہے وہ باتیں

اب میں ہمہ تن گوش بنوں یا ہمہ تن چشم

نصیرؔ اس زلف کی یہ کج ادائی کوئی جاتی ہے

مثل مشہور ہے رسی جلی لیکن نہ بل نکلا

ہم وہ فلک ہیں اہل توکل کہ مثل ماہ

رکھتے نہیں ہیں نان شبینہ برائے صبح

دود آہ جگری کام نہ آیا یارو

ورنہ روئے شب ہجر اور بھی کالا کرتا

یہ چرخ نیلگوں اک خانۂ پر دود ہے یارو

نہ پوچھو ماجرا کچھ چشم سے آنسو بہانے کا

کیوں مے کے پینے سے کروں انکار ناصحا

زاہد نہیں ولی نہیں کچھ پارسا نہیں

ہوا پر ہے یہ بنیاد مسافر خانۂ ہستی

نہ ٹھہرا ہے کوئی یاں اے دل محزوں نہ ٹھہرے گا

اے خال رخ یار تجھے ٹھیک بناتا

جا چھوڑ دیا حافظ قرآن سمجھ کر

جا بجا دشت میں خیمے ہیں بگولے کے کھڑے

عرس مجنوں کی ہے دھوم آج بیابان میں کیا

کوئی یہ شیخ سے پوچھے کہ بند کر آنکھیں

مراقبے میں بتا صبح و شام کیا دیکھا

دیکھ تو یار بادہ کش میں نے بھی کام کیا کیا

دے کے کباب دل تجھے حق نمک ادا کیا

دلا اس کی کاکل سے رکھ جمع خاطر

پریشاں سے حاصل کب اک دام ہوگا

تار مژگاں پہ رواں یوں ہے مرا طفل سرشک

نٹ رسن پر چلے ہے جیسے کوئی رکھ کر پاؤں

عشق ہی دونوں طرف جلوۂ دلدار ہوا

ورنہ اس ہیر کا رانجھے کو رجھانا کیا تھا

خیال ناف بتاں سے ہو کیوں کہ دل جاں بر

نکلتے کوئی بھنور سے نہ ڈوبتا دیکھا

تو تو اک پرچہ بھی واں سے نامہ بر لایا نہ آہ

زندگی کیوں کر ہو گر ہم دل کو پر جاویں نہیں

کی ہے استاد ازل نے یہ رباعی موزوں

چار عنصر کے سوا اور ہے انسان میں کیا

اسی مضمون سے معلوم اس کی سرد مہری ہے

مجھے نامہ جو اس نے کاغذ کشمیر پر لکھا

ملا کی دوڑ جیسے ہے مسجد تلک نصیرؔ

ہے مست کی بھی خانۂ خمار تک پہنچ

خدا گواہ ہے میں شغل بت پرستی میں

سوائے عشق کسی کام سے نہیں واقف

دیکھو گے کہ میں کیسا پھر شور مچاتا ہوں

تم اب کے نمک میرے زخموں پہ چھڑک دیکھو

متاع دل بہت ارزاں ہے کیوں نہیں لیتے

کہ ایک بوسے پہ سودا ہے اب تو آ ٹھہرا

پوچھنے والوں کو کیا کہیے کہ دھوکے میں نہیں

کفر و اسلام حقیقت میں ہیں یکساں ہم کو

سپر رکھتا ہوں میں بھی آفتابی ساغر مے کی

مجھے اے ابر تیغ برق کو چمکا کے مت دھمکا

شراب لاؤ کباب لاؤ ہمارے دل کو نہ اب گھٹاؤ

شروع دود قدح ہو جلدی کہ سر پہ ابر بہار آیا

بوسۂ خال لب جاناں کی کیفیت نہ پوچھ

نشۂ مے سے زیادہ نشۂ افیوں ہوا

بنا کر من کو منکا اور رگ تن کے تئیں رشتہ

اٹھا کر سنگ سے پھر ہم نے چکناچور کی تسبیح

نہ ہاتھ رکھ مرے سینے پہ دل نہیں اس میں

رکھا ہے آتش سوزاں کو داب کے گھر میں

مشکل ہے روک آہ دل داغ دار کی

کہتے ہیں سو سنار کی اور اک لہار کی

سب پہ روشن ہے کہ راہ عشق میں مانند شمع

پاؤں پر سے ہم نے قرباں رفتہ رفتہ سر کیا

دن رات یہاں پتلیوں کا ناچ رہے ہے

حیرت ہے کہ تو محو تماشا نہیں ہوتا

غرض نہ فرقت میں کفر سے تھی نہ کام اسلام سے رہا تھا

خیال زلف بتاں ہی ہر دم ہمیں تو لیل و نہار آیا

کعبے سے غرض اس کو نہ بت خانے سے مطلب

عاشق جو ترا ہے نہ ادھر کا نہ ادھر کا