تکوگے راہ سہاروں کی تم میاں کب تک

قدم اٹھاؤ کہ تقدیر انتظار میں ہے

اگر پھولوں کی خواہش ہے تو سن لو

کسی کی راہ میں کانٹے نہ رکھنا

پڑوسی کے مکاں میں چھت نہیں ہے

مکاں اپنے بہت اونچے نہ رکھنا

اجنبی راستوں پر بھٹکتے رہے

آرزوؤں کا اک قافلا اور میں

دیر تک مل کے روتے رہے راہ میں

ان سے بڑھتا ہوا فاصلا اور میں

فرشتوں میں بھی جس کے تذکرے ہیں

وہ تیرے شہر میں رسوا بہت ہے

یہ مانا وہ شجر سوکھا بہت ہے

مگر اس میں ابھی سایا بہت ہے

ہم کو خبر ہے شہر میں اس کے سنگ ملامت ملتے ہیں

پھر بھی اس کے شہر میں جانا کتنا اچھا لگتا ہے

مرے عیبوں کو گنوایا تو سب نے

کسی نے میری غم خواری نہیں کی

خطا میں نے کوئی بھاری نہیں کی

امیر شہر سے یاری نہیں کی