بارہ پیٹھے تیرہ لاگی

ایک زمیندار کسی راجے کے یہاں نذرانے کو بارہ پیٹھے لے گیا۔ وہ شہر کے دروازے پر پہنچا تو ایک بیٹھا چنگی والے نے رکھوا لیا کہ ہمارا حق دیتے جاؤ۔ دوسرا پولیس کے سپاہی نے ہتھیا لیا جو دروازے پر پہرہ دے رہا تھا۔ تیسرا سارجنٹ نے اڑا لیا اور چوتھا کوتوال صاحب کی نذر ہو گیا جو اس وقت گشت کے لیے آ نکلے تھے۔

غریب باقی آٹھ پیٹھے لے کر راجے کے دربار کو روانہ ہوا تو اسے اتنے خدمتگار چوبدار، چپراسی، اردلی وغیرہ لپٹ گئے کہ جان چھڑانی مشکل ہو گئی۔ مختصر یہ کہ راجا صاحب کو اطلاع ہونے تک بارہ پیٹھے تو یونہی بٹ گئے، بلکہ ایک چپراسی نے اپنے حصے کے دعوے میں وہ رسی کا جال بھی اٹھا لیا، جس میں پیٹھے بندھے ہوئے تھے۔

یہ چھینا جھپٹی ہو رہی تھی کہ راجا صاحب بھی کسی ضرورت کے لیے باہر آ نکلے اور اردلی وغیرہ نوکروں کو زمیندار کے ساتھ لپٹا ہوا دیکھ کر پوچھا۔ ’’ایں! یہ شور کیسا ہے؟‘‘

کسان نے عرض کی۔ ’’غریب پرور! بارہ پیٹھے اور تیرہ لاگی کا معاملہ ہے۔‘‘

راجے نے اس عجیب معمے کی تفصیل سنی تو ان تمام لوگوں کو موقوف کر دیا جنہوں نے زمیندار سے رشوت لی تھی اور زمیندار کو کچھ انعام دے کر آئندہ کے لیے حکم دے دیا کہ اگر کوئی اہلکار کسی شخص سے رشوت لے گا تو سخت سزا پائے گا۔