اور تو کچھ بھی نہیں حضرت ماچسؔ لیکن

آپ میں آگ لگانے کا کمال اچھا ہے

وہ ان کا زمانہ تھا جہاں عقل بڑی تھی

یہ میرا زمانہ ہے یہاں بھینس بڑی ہے

واعظ نے مجھ میں دیکھی ہے ایمان کی کمی

واعظ میں صرف دم کی کسر دیکھتا ہوں میں

جس مولوی کو آگے پڑھانا تھا میرا عقد

ٹھہرا ہے ان کا عقد اسی مولوی کے ساتھ

ڈھونڈئیے خیر سے جا کر کوئی موٹی سسرال

ہاتھ جو مفت میں آئے تو وہ مال اچھا ہے

واعظ کو جو دیکھو تو گھٹا ٹوپ اندھیرا

ساقی کو جو دیکھو تو کرن پھوٹ رہی ہے

حکم بیگم کے چلا کرتے ہیں جیلر کی طرح

اب مرا گھر بھی مجھے جیل ہوا جاتا ہے

تعداد میں ہیں عورتیں مردوں سے زیادہ

قوالیاں موجود ہیں قوال ندارد

جو بھی ہارے گا وہی گالیاں دے گا اس کو

جس برہمن نے کہا ہے کہ یہ سال اچھا ہے

جب شیخ و برہمن سے ہوا دل مایوس

شیطان نے نیتاؤں کو تیار کیا

جیسے اسلام میں ہے رسم مسلمانی کی

ویسے ہی عشق میں ہے چاک گریبانی کی

شیخ جی رندوں میں جس دن پھنس گئے

ان کی داڑھی نوچ ڈالی جائے گی

عدو کی موت پر اپنی خوشی کا خواب دیکھا ہے

خدا وندا کہیں یہ واقعہ الٹا نہ ہو جائے

نار و جنت کی سناتا ہے خبر یوں واعظ

جیسے اخبار وہاں سے ترے نام آتا ہے

نظم جہاں کو زیر و زبر دیکھتا ہوں میں

مادہ کے اختیار میں نر دیکھتا ہوں میں

دونوں ہی ایک ہیں لاحول ہو یا لفظ شراب

ایک شیطان کے اک شیخ کے کام آتا ہے

سر پہ واعظ کے وہ استرا چل گیا

وہ اندھیرا چھٹا روشنی ہو گئی

سنتے ہیں جتنی حسینوں سے سوا ہوں باتیں

اتنا ہی حسن بیاں حسن کلام آتا ہے

اللہ اللہ رہ عشق کی ٹھوکریں

چار دن میں طبیعت ہری ہو گئی

اس قدر صرف الٰہی مرے خون دل کا

اب محبت کا بجٹ فیل ہوا جاتا ہے

اللہ رے رعب و داب جنوں بھاگتا ہے وہ

جس کی طرف اٹھا کے نظر دیکھتا ہوں میں

حوادث جب کسی کو تاک کر چانٹا لگاتے ہیں

تو ہفتوں کیا مہینوں کھوپڑی سہلائی جاتی ہے

اونٹ کی طرح ہیں یہ شیخ و برہمن بدنام

ان ہی بے چاروں کا ہر بات میں نام آتا ہے

بتوں پر میں اگر مائل ہوں وہ حوروں پہ مائل ہیں

جناب شیخ میں بھی یہ حماقت پائی جاتی ہے

سائے کی تمنا میں جہاں بیٹھ گیا ہوں

چندیا پہ وہیں تاک کے دیوار گری ہے

ختم جرم نگاہ ہو جائے

کاش واعظ کا بیاہ ہو جائے

مرے پر اس کو سو درے نہ کہئے پھر تو کیا کہئے

ترے عاشق کی میت ڈاکٹر خانے میں رکھی ہے

آہ سوزاں نے ماچسؔ اثر تو کیا

ان کی صورت تو کچھ سانولی ہو گئی