غول کے غول مرے صحن میں آ بیٹھتے ہیں

یہ پرندے مجھے ہجرت نہیں کرنے دیتے

میں کاٹا جاؤں گا سب کو عزیز ہوتے ہوئے

سڑک کے بیچ میں آیا ہوا درخت ہوں میں

تمہارے ساتھ اک دنیا کھڑی ہے

ہمارے ساتھ تو ہم بھی نہیں ہیں

ہمارے بعد بھی تم قہقہے لگاتے ہو

تمہارے بعد تو ہم بات بھی نہیں کرتے

ہم کو خوشیاں بھی اداسی کے لفافے میں ملیں

ہم سا بد بخت زمانے میں نہیں ہے کوئی

مجھ پہ کھلتا نہ کبھی لفظ محبت میں نے

ماں کو دیکھا تو سمجھ آئی محبت کیا ہے

میں کہ محروم تھا آواز کی رعنائی سے

تم جو آئے ہو تو احساس بھی سن سکتا ہوں

زیب دیتا ہے اسے اتنا تغافل مجھ سے

وہ کہیں اور بھی مصروف وفا ہے شاید

لفظ احساس کو تصویر نہیں کر سکتے

عشق دنیا کی زبانوں سے بڑا ہے شاید

یہ لمحہ جس میں ہم آج چھپ کر گلے ملے ہیں

اگر مقدر نہیں ملا تو سزا بنے گا