ہے کیا جو کس کے باندھئے میری بلا ڈرے

تشریح

غالب کے اس شعر میں غضب کی ظرافت پائی جاتی ہے۔ غالب کی شاعری کا ایک دلچسپ عنصر ظریفانہ طرزِ بیان بھی ہے ۔ انہوں نے جگہ جگہ اپنی ظرافت کے جلوے دکھائے ہیں۔ اس شعر کے مضمون پر کچھ بیان کرنے سے پہلے اس کے محرکات کو جاننا ضروری ہے۔ دراصل شعر کے مضمون کے دو پہلو ہیں۔ ایک یہ کہ غالب کا محبوب انہیں غارت کرنے کے کئے کمر بستہ ہونے کی دھمکی دیتا ہے۔ دوسرا یہ کہ محبوب کی کمر نازکی کی وجہ اس قدر پتلی ہے کہ غالب اسے لگ بھگ موہوم تصورکرتے ہیں۔

پہلے مصرعے میں’’ہے کیا‘‘ کے معنی کے دو پہلو ہیں۔ ایک یہ کہ غالب کا محبوب جب کمر بستہ ہونے کی دھمکی دیتا ہےتو غالب اس سے پوچھتے ہیں کہ کیا تمہارے پاس کمر بھی ہے جو تم کَس کے باندھنے جارہے ہو۔ دوسرا یہ کہ تمہاری کمر اس قدر پتلی ہے کہ اسے باندھا ہی نہیں جاسکتا۔ اگر شعر میں ’’میری بلا ڈرے‘‘ کا دعویٰ نہیں ہوتا تو باور یہی ہوتا ہے غالب اپنے محبوب کی کمر کی نازکی کی تعریف کررہے ہیں۔ مگر ’’ میری بھلا ڈرے‘‘ سے فوراً ذہن اس پہلو کی طرف جاتا ہے کہ غالب کے محبوب نے اسے ختم کرنے کے لئے کمر بستہ ہونے کی دھمکی دی ہے۔ اس دھمکی کے جواب میں غالب نہایت اعلیٰ ظریفانہ انداز میں جواب دیتا ہے کہ کیا تمہارے پاس کمر نام کی بھی کوئی چیز ہے۔ اور یہ کہ کیا میں اس حقیقت سے آشنا نہیں ہوں کہ تمہاری کمر نزاکت کی وجہ سے اس قدر پتلی ہے کہ اسے باندھا ہی نہیں جاسکتا۔

شعر کی خوبی یہ کہ غالب نے اپنے محبوب کی دھمکی کا بھی جواب دیا ہے اور اس کی کمر کی تعریف کرکے اسے خوش بھی کیا ہے۔ یہی غالب کا کمال ہے۔

شفق سوپوری