خلق میں ہیں پر جدا سب خلق سے رہتے ہیں ہم

تشریح

سم ہندوستانی موسیقی کی اصطلاح ہے۔ اس کا تعلق تال سے ہے۔ تال کہتے ہیں موسیقی کے وزن کو۔ جس طرح ہمارا عروضی نظام ارکان پر مبنی ہے اسی طرح ہندوستانی موسیقی میں تال کا نظام ماتراؤں پر مبنی ہے۔ جیسے دھا گے نا تی نا کے دھن نا(آٹھ ماترائیں: کہروا تال)۔ سم اس جگہ کو کہتے ہیں جہاں تال کا آغاز ہوتا ہے۔ تال کی پہلی ماترا سم کہلاتی ہے۔ ہر تال چکر میں ایک ہی بار سم آتا ہے۔ سنگیت میں خاص زور دے کر سم کو ظاہر کیا جاتا ہے۔ عام طور پر گانے کا اختتام سم پر ہی ہوتا ہے۔ تال کی زبان میں سم کی جگہوں پر ضرب کا نشان لگایا جاتا ہے۔

دردؔ کے شعر میں روپک کا لفظ استعمال ہوا ہے۔ روپک کے بارے میں یہ جاننا ضروری ہے کہ یہ ایک معروف مروجہ تال ہے۔ ہندوستانی فلموں کے کئی مشہور گانے اس تال پر گائے گیے ہیں۔ جیسے‘‘تیرے میرے ملن کی یہ رینا’’،‘‘تیری بندیا رے’’، ‘‘آپ کی نظروں نے سمجھا پیار کے قابل مجھے’’، ‘‘میرا جیون کورا کاغذ کورا ہی رہ گیا’’وغیرہ۔ روپک میں سات ماترائیں ہوتی ہیں۔ خاص بات یہ ہے کہ اس میں سم کی ضرب پر خالی ہے۔ تعجب کی بات یہ نہیں ہے کہ دردؔ کو اس بات کا علم تھا کہ روپک میں سم کی جگہ خالی ہے بلکہ حیرت اس بات سے ہوتی ہے کہ انہوں نے اس نکتے سے ایک نادر مضمون پیدا کیا ہے۔ لوگوں میں رہ کر یہ دعویٰ کرنا کہ میں ان میں شمار نہیں ہوتا ایک غیر منطقی بات ہے مگر دردؔ نے کیا خوبصورت اور حیران کن دلیل پیش کی ہے کہ جس طرح سے روپک تال میں پانچویں ماترا جو اس کا سم ہے تال میں شامل تو ہے مگر اسے خالی مانا جاتا ہے اسی طرح میں بھی خلق میں رہ کر بھی خلق سے جدا ہوں۔

شفق سوپوری