"آخری دن کی تلاش"جدید شاعری کے نمائندہ شاعر محمد علوی کا شعری مجموعہ ہے۔ محمد علوی کو بالعموم حواس کا شاعر سمجھا جاتا ہے،یعنی جو کچھ دکھائی دیتا ہے اس کو بیان کردیتے ہیں،گویا ان کے یہاں سامنے کی باتیں ہیں یادوسرے لفظوں میں محمد علوی کی شاعری معمولات اور مانوس معنی کی شاعری ہے ۔ان کے یہاں مکمل جدید حسیت عود آئی ہے۔ان کی شاعری میں ان کی ذات کی نمائندگی جگہ جگہ دیکھنے کو ملتی ہے۔زیر مطالعہ ان کا دوسرا مجموعہ ہے جس میں شاعر کے لہجے کی تازگی اور ذوق و تجسس نمایاں ہے۔ مجموعہ کی ابتدا "آخری دن کی تلاش" نظم سے ہوئی ہے۔اس کے علاوہ ابن مریم،ایک منظر، سورج، کون ، نیادن ،یکم جنوری، پہلا خدا وغیرہ مختلف موضوعات کا احاطہ کرتی نظمیں اور غزلیں شامل ہیں۔محمد علوی کی شاعری اپنی اشاریت اور علامیت کے ساتھ ساتھ اسلوب کی پیچیدگی کی خاصیت سے بھی انفرادیت رکھتی ہیں۔ان کی نظموں کا ایک وصف یہ ہے کہ وہ اپنے قاری کو پہلے احساس کی آنچ میں اس شدت سے شامل کرلیتے ہیں کہ یوں لگتا ہے جیسے یہ سب اسی پر گزرا ہو۔