پیش نظر ڈاکٹر صغیر افراہیم کی پریم چند کی تخلیقات اور معروف کرداروں کا تنقیدی مطالعہ بعنوان "پریم چند ایک نقیب" ہے۔ جو مصنف کے چار مضامین اور ایک سوانحی خاکہ پر مشتمل ہے۔ ان مضامین کے ذریعہ مصنف نے پریم چند کی تخلیقات سے صحت مند رجحانات کو نمایاں کیا ہے، جو پریم چند کی تحریروں کا خاصا ہیں۔ کتاب کا پہلا مضمون "پریم چند پر مختلف تحریکوں کے اثرات" کے تحت پریم چند کی افسانوی ارتقا کا جائزہ، دوسرا مضمون "ہوری۔۔۔ ایک علامتی کردار" کے تحت پریم چند کے مشہورناول "گئودان" کے معروف کردار کا علامتی تجزیہ پیش کیا ہے۔ کتاب کا تیسرا مضمون "شاہکار تخلیق۔۔ کفن" اور چوتھا مضمون "افسانہ نگار۔۔۔ پریم چند " ہے۔ جس کے مطالعے سے قارئین پریم چند کی تخلیقاتی شعور، اسلوب، متنوع موضوعات اور حقیقی کردار سے متعارف ہوجائیں گے۔ اور آخر میں پریم چند کا مختصر سوانحی خاکہ ہے جن میں اختصار کے ساتھ ان کے حالات زندگی قلمبند ہیں۔ کتاب کے دوسرے ایڈیشن میں ایک مضمون کا اضافہ کیا گیا ہے، ان کے افسانوی مجموعہ 'واردات' کا تجزیاتی مطالعہ بھی پیش کیا گیا ہے، یہ مجموعہ بہت اہم، اکثر یونیورسٹی کی نصابی کتابوں میں اس مجموعہ کو شامل کیا گیا ہے۔